Ertzaintzak gizon bat atxilotu du meatzaldeko herri horretan, estetika-zentro batean indarra erabiliz lapurreta egitea leporatuta. Atxilotuak establezimenduko erakusleihoa hautsi du estolda-tapa batekin, eta hainbat produktu lapurtu ditu barrutik.
Gaur goizaldeko 03:45ean, Ertzaintzari Trapagarango (Bizkaia) La Escontrilla auzora joateko eskatu diote, berriemaile batek ohartarazi baitu gizon bat establezimendu bateko erakusleihoa kolpatzen ari zela.
Patruilak iritsi direnean, agenteek egiaztatu ahal izan dute erakusleihoa kutxatila-tapa batekin hautsita zegoela. Polizia-baliabideek handik laster aurkitu dute berriemaileak emandako deskribapenarekin bat zetorren gizon bat.
Susmagarriari egindako polizia-miaketan, estetika-zentrotik hartutako hiru perfume eta nezeser bat aurkitu dizkiote.
Hori dela eta, inplikatua, espainiar nazionalitateko 36 urteko gizona eta horrelako egitateengatik aurrekari ugari dituena, gauzetan indarra erabiliz lapurreta egiteagatik atxilotu dute.
Atxilotua polizia-egoitzara eraman dute beharrezko eginbideak hasteko, eta, horiek amaitutakoan, agintari judizialaren eskuetan jarriko dute.