- Eusko Jaurlaritzak aisialdiko ontziak gobernatzeko titulazioen deskarga digitala aktibatu du, balio juridiko osoarekin
- “Administrazioa herritarrengana hurbiltzen jarraitzen dugu, izapideak erraztuz eta egunerokoan baliagarriak diren irtenbide digitalak eskainiz”, azpimarratu du Amaia Barredok
Eusko Jaurlaritzako Elikadura, Landa Garapen, Nekazaritza eta Arrantza Sailak kirol-txartel nautikoak NIK Patrika Digitala aplikazioan txertatzeko aukera jarri du martxan, titularrei beren egiaztagiri ofiziala zuzenean telefono mugikorrean edukitzeko aukera emanez.
Euskal Autonomia Erkidegoan aisialdiko ontziak gobernatzeko gaitzen duen txartela duten pertsonek dagoeneko deskarga dezakete formatu digitalean, eta zuzenean aurkeztu ahal izango dute eskatzen zaienean, dokumentu fisikoaren balio juridiko berarekin.
NIK Patrika Digitala aplikazioak herritarrei dokumentu ofizialak modu seguruan gorde eta kudeatzeko aukera ematen die beren gailu mugikorrean, alferrikako joan-etorriak saihestuz eta txartel fisikoa galtzeko edo hondatzeko arriskua murriztuz. Neurri honek beste urrats bat suposatzen du zerbitzu publikoen digitalizazioan eta Administrazioaren eta herritarren arteko harremana modernizatzeko bidean.
Elikadura, Landa Garapen, Nekazaritza eta Arrantza sailburu Amaia Barredok aplikazioak gero eta handiagoa den eskaerari irtenbidea ematen diola azpimarratzen du: “Kirol-txartel nautikoak NIK Patrika Digitalera gehitzearekin, urrats sendoa egiten dugu gure zerbitzu publikoen modernizazioan, erabiltzaileei beren titulazioa edozein unetan egiaztatzeko tresna erosoa, segurua eta guztiz balioduna eskainiz”.
Txartel nautikoa patrika digitalean gehitzeko, interesdunek NIK Patrika Digitala aplikazioa instalatu beharko dute (Play Store eta App Storen eskuragarri), identifikazio elektronikoko sistema bat eduki beharko dute (BakQ edo baliokidea), eta aplikaziora sartu dagokion lizentzia mota deskargatzeko.
Neurriak bereziki onura dakar Euskadin aisialdiko nabigazioa praktikatzen dutenentzat, beren titulazioa ikuskapen edo kontrolen aurrean egiaztatzea erraztuz eta administrazio-kudeaketa sinplifikatuz. Gainera, Eusko Jaurlaritzaren administrazio eraginkorrago, jasangarriago eta hurbilago baten aldeko apustua indartzen du.
“Teknologia herritarren zerbitzura egotea nahi dugu, Administrazioarekiko harremana sinplifikatuz eta haien esperientzia hobetuz aisialdiko nautika bezain garrantzitsua den esparru batean, gure herrian errotze handia duen sektorea baita”, gaineratu du Barredok.
Ekintza honekin, Sailak aurrera jarraitzen du bere zerbitzuen digitalizazio integralean eta Euskadin aisialdiko ontziak gobernatzeko titulazioetarako irisgarritasuna hobetzeko bidean.