Ertzaintzak hiru pertsona atxilotu zituen atzo Usurbilgo saltoki batean 2100 euroko balioko gauzak lapurtzea leporatuta. Gainera, 3500 euroko balioko beste ustezko lapurreta bat ere ikertzen ari dira.
Atzo, asteazkena, 15:00ak aldera, ertzainak Usurbilgo merkataritza gune batera joan ziren, segurtasun-jagole batek hiru pertsona, bi gizon eta emakume bat, baitzituen atxikita kirol-materialen denda batetik hainbat arropa lapurtzen ikusi zituelako.
Patruilek, merkataritza-parkeko segurtasun-kamerak begiratu ondoren, ikusi zuten pertsona horiek aparkalekuko ibilgailu batean utzi zituztela lapurtutako objektuak. Ibilgailua miatu zutenean, lapurtutako objektuak, 2100 euro inguruko balioa zutenak, aurkitu zituzten, bai eta 3500 euroko balioa zuten produktu kosmetikoak eta dendetan lapurretak egiteko erabilitako materiala ere, hala nola dendetatik lapurtutako produktuekin ateratzean alarmak ez aktibatzeko prestatutako poltsa bat eta bandolera bat eta salgai dauden objektuen alarmak kentzeko kako bat.
Horregatik guztiagatik, ertzainek bi gizonak, 38 eta 34 urtekoak, eta emakumea, 44 urtekoa, hirurak latinoamerikar jatorrikoak, atxilotu zituzten ebasketa-delitu bana leporatuta.
Atxilotuek aurrekariak dituzte era horretako egintzengatik, eta polizia-egoitzara eraman zituzten zegozkion eginbideak hasteko. Horiek amaitu ondoren, epailearen eskuetan jarriko dituzte.
Ertzaintzak zabalik du ikerketa ustez lapurtutakoak diren produktu kosmetikoen jatorria argitzeko.