Zerbitzuz kanpo zegoen agente batek esku hartu izanari esker, Ertzaintzak gizon bat atxilotu du joan den igandean Gipuzkoako hiriburuan indarkeria erabiliz lapurreta egiteagatik.
Atzo, asteartea, arratsaldeko lauetan, hainbat abisu jaso ziren, Donostiako erdialdeko kale batean pertsona batzuk borrokan ari zirela esanez. Bertaratu ziren agenteek borrokan parte hartzen ari ziren pertsonak identifikatu zituzten. Une horretan, zerbitzuz kanpo zegoen agente bat haiengana hurbildu zen, eta esan zien identifikatu berri zuten gizonetako bat bi egun lehenago indarkeria erabiliz egindako lapurreta batean inplikatuta zegoela.
Indarkeriaz egindako lapurreta gertatu zen egunean lanean ari zen agenteak lapurra ezagutu zuen, aurretik bere argazki bat ikusi baitzuen, biktimak zegokion salaketa jarri ondoren hasitako ikerketaren barruan. Salaketa horren arabera, gazte bat hurbildu zitzaion Donostiako Cristina Enea parkean paseatzen ari zenean, eta eskuetatik telefono mugikorra kentzen saiatu zen bultza egin eta lurrera erorarazita, eta gero poltsa kentzen ere ahalegindu zen.
Biktima, espainiar nazionalitateko 71 urteko emakumea, osasun-zerbitzuek artatu behar izan zuten bultza eginda lurrera erori zenean min hartu zuenez.
Horren aurrean, atxilotu egin zuten magrebtar jatorriko 29 urteko gizona, indarkeria erabiliz lapurreta egiten saiatzea leporatuta, eta, ondoren, polizia-egoitzara eraman zuten zegozkion eginbideak betetzera. Horiek amaitu ondoren, aske utzi zuten eta epaileak noiz deituko zain dago.