Ertzainek 23 urteko gizon bat atxilotu dute Arrankudiagan, trafikoko prebentziozko kontrol batean Bilbon lapurtutako auto batekin zirkulatzen atzeman ondoren. Gainera, bide-segurtasunaren aurkako delitu batengatik ikertu dute, gidabaimenik inoiz ez izateagatik.
Atzo, igandea, eguerdiko hamabiak aldera gertatu zen BI-625 errepidean, Arrankudiaga parean, zirkulazioko prebentziozko kontrol batean.
Laudioko Ertzain-etxeko agenteek ibilgailu baten gidaria geldiarazi zuten alkohola eta drogak hautemateko probak egiteko, eta positibo eman zuen droga-testean. Gainera, ibilgailua beste pertsona baten izenean zegoen, eta inplikatuak agenteei esan zien lagun batek utzi ziola.
Beharrezko egiaztapenak egin ondoren, egiaztatu ahal izan zuten autoa Bizkaiko hiriburuko kale batetik, jabeak larunbat arratsaldean aparkatuta utzi zuen lekutik, lapurtu zutela. Ertzaintzaren Koordinazio Zentrotik agente jarduleei jakitera eman zietenez, gidariak ez zuen gidabaimenik.
Ebidentzia horien aurrean, gidaria, magrebtar jatorriko 23 urteko gaztea, ibilgailua erabiltzeko lapurtzearen delituagatik atxilotu zuten, eta eginbideak ireki dizkiote ikertu gisa bide-segurtasunaren aurkako delitu batengatik, inoiz ez duelako gidabaimenik izan.
Atxilotuak polizia-aurrekariak ditu batez ere antzeko delituengatik eta jabetzaren aurkako beste delitu batzuengatik, eta atzo bertan, igandean, jarri zuten epailearen eskuetan, beharrezko eginbideak amaitutakoan.