Barakaldoko Udala proiektu berriak lantzen ari da Burtzeña auzorako

Zumalakarregi etorbidean irisgarritasuna hobetuko da, igogailu bat jarriko da Dominicas ikastetxeko kalezuloaren eta Munoa kalearen artean eta arrapala bat egingo da Llano eta Munoa kaleen artean. Jarduketa horiek 1,5 milioi euroko aurrekontua dute. Gorka Zubiaurre zinegotziak osoko bilkuran esan duenez, «Burtzeñak benetako laguntza behar du», eta azken urteotan auzoan obretan bakarrik inbertitu diren 2 milioi euro baino gehiago gogorarazi ditu.

«Burtzeñak benetako laguntza behar du». Hala adierazi du gaur arratsaldean Gorka Zubiaurre Alkatetzako zinegotziak Barakaldoko auzoari buruzko mozioan. Joan den martxoaren 12an auzo-elkartearekin izandako bileraren ondoren, zinegotziak nabarmendu du iaztik Amaia del Camporen gobernu-taldea hiru proiektu berri lantzen ari dela Burtzeñan: Zumalakarregi etorbidean irisgarritasuna hobetzea, Dominicas ikastetxeko kalezuloaren eta Munoa kalearen artean igogailu bat jartzea eta Llano eta Munoa kaleen artean arrapala bat sortzea. Ekintza horiek 1,5 milioi euroko balioa dute. «Bilera hartan segurtasunari buruz ere hitz egin genuen, Gruber eta kotxetegiei buruz, Burtzeña Parkeari buruz, gasolindegiari buruz eta El Calerori buruz; auzoari asko interesatzen zaizkion proiektuak dira», adierazi du Zubiaurrek, eta gogorarazi du orain arte bi milioi euro baino gehiago inbertitu direla Burtzeñako hobekuntza-ekintzetan.

Osoko bilkuran jorratutako mozioak Burtzeñako bizilagunak kezkatzen dituzten hainbat gairi buruzko errepasoa egiten du; kezka horiek gobernu taldeak partekatzen ditu eta lantzen ari dira. Gainera, auzoan egindako ekintzak errepasatu dira, bi milioi eurotik gorakoak. Horiei gehitu beharko litzaieke bizikletaren bidez auzoa Lutxanarekin eta Zorrotzarekin lotzen duen bidegorria egiteko milioi bat euroko inbertsioa, auzora Bizkaibizi zerbitzua iristearekin osatzen dena.

Mozioa onartu egin dute eta Zubiaurrek «Burtzeñaren alde lanean» jarraituko dutela adierazi du.