El Caleroko pabiloiak eraisteko lizentzia iraungi egingo da, baldin eta sustatzaileak ez badu aurkezten obrak abiarazteko eskatutakoa

Tokiko Gobernu Batzarrak 2023ko apirilaren 28an obra lizentzia eman zion Burtzeña auzoko El Calero planaren sustatzaileari abandonatutako lehen pabilioiak eraisteko. Ia urtebete igaro da ordutik, eta Udalak, indarrean dagoen legeria aplikatuz, baimena iraungitzat jo beharko du datozen egunetan, baldin eta sustatzaileak ez badu aurkezten obrak abiarazi ahal izateko eskatutakoa.

Etxebizitza, Hirigintza Plangintza eta Kudeaketako zinegotzi Juan Antonio Pizarrok egoera horren berri eman du, eta, aldi berean, proiektu garrantzitsu horrekin duen konpromisoa berretsi du, baina «proiektuan egindako aurrerapenak nahi baino motelagoak» direla nabarmendu du. Izan ere, URA-Uraren Euskal Agentziak berriki adierazi du iraungitzat jo duela El Caleroko planari buruz irekita zuen espedientea.

Etxebizitza, Plangintza eta Hirigintza Kudeaketa Arloak idazki bat bidali zion sustatzaileari martxoaren 13an, eta jakinarazi zion lizentzia laster iraungiko zela, gehienez ere 11 hilabeteko epean. Hala ere, obrak ez dira abiatu, eta, hasteko, enpresak aldez aurreko baimen sektorialak aurkeztu behar ditu, eta, gainera, 380.952,86 euroko fidantza jarri behar du Udal Diruzaintzan, hondakinen kudeaketa egokia bermatzeko.

URAren baimenaz gain, Lurzoruari eta Hirigintzari buruzko 2/2006 Legean oinarrituta, sustatzaileak beste bost erakunderen oniritzia lortu behar du eraisteari ekin aurretik: Aldundiko Azpiegitura Saila (aldeko txostena eman du), Euskal Trenbide Sarea (ETS), Bilbao Bizkaia Ur Partzuergoa, Aire Segurtasuneko Estatu Agentzia (AESA), Eusko Jaurlaritzako Ingurumen Saila eta Osalan (Laneko Segurtasun eta Osasunerako Euskal Erakundea).

Eraisteak Calero Viejo kaleko 25. zenbakiko 35.235,11 metro karratuko lursail batean egingo dira. Garai batean Refractarios Burceña enpresak okupatzen zuen lursaila. Jarduketa-eremua sei zonatan banatuta dago, eta bakoitzak bere higiezinak edo eraikuntza-multzoak ditu.

Pizarrok gogorarazi du El Caleroko proiektua 2007koa dela, Tontxu Rodríguez alkate zela. Planak aurreikusten du 20.000 metro karratu berdegune eta 7.700 metro karratu lurzoru sortzea ekipamenduetarako, aire zabaleko kirol-parke bat sortzea barne, baita bostehun etxebizitza inguru eraikitzea ere, eta horietatik ia erdiak babes ofizialekoak eta tokikoak izango dira. Eraikinetan 2.442 metro karratu gordeko dira beheko solairuetan ekipamendu komunitarioetarako. Era berean, FEVEren trenbidearen hesi arkitektonikoa kenduko da, zati bat estaliz.

ITXAROPEN FALTSURIK EZ SORTZEA

«Proiektu hau Burtzeñako beharrezko hiri-eraldaketaren abiapuntua izango da, auzotarrek aspalditik arrazoiz eskatzen dutena. Bagenekien izapideak motelak izango zirela, baina ez hainbeste. Politikan, egia aurretik joan behar dugu beti, eta, obra-lizentziaren emakida iragarri genuen bezala, laster iraungiko dela jakinarazi behar genuen. Ezin da itxaropen faltsurik sortu hauteskundeak dauden bakoitzean, zoritxarrez El Caleron gertatzen ari den bezala. Era berean, ez dira sinesgarriak proiektua sistematikoki blokeatzen saiatzen ari direnak eta auzoaz arduratzen ari direnak «, adierazi du Juan Antonio Pizarrok.

Proiektuarekiko konpromisoaren erakusgarri, zinegotziak jakinarazi du prest daudela El Caleroko Hirigintza Jarduketarako Programa (UJP) onartzeko txosten teknikoak, eta aurreko legealdian Udalbatzak hirigintza-plan horren behin-behineko onarpena (2020ko otsailaren 27a) eta behin betikoa (2022ko otsailaren 24a) sustatu eta onartu zituela.