Gorostiza auzoak haurrentzako parke berri bat izango du kiroldegiaren ondoan. Jarduera honen bidez, partaidetza-aurrekontuetan boto gehien jaso dituzten bi ekimen biltzen dira. Horietan, bizilagunek Iguliz urbanizazioan parke berri bat sortzea eta kiroldegiko kanpo-parkea osorik eraberritzea eskatzen zuten. Antzeko bi proposamen direnez, biak bateratzea erabaki da, eta kiroldegitik gertu dagoen haurren gunea guztiz eraberritzea, parkearen azalera handituz eta berrikuntzak gehituz, hala nola 25 metroko tirolina handi bat, txikienekin gozatzeko.
Gaur egun, eremu horretan haurrentzako parke txiki bat dago, adinekoentzako parke bioosasungarri batekin batera. Jarduera honekin, erabat berrituko da espazioa, 25 metro luzeko tirolina bat izango duen jolasgune handi bat sortuz; kulunkatzeko zabuak, mugikortasun urriko haurrentzat egokitutako saski batekin; egurrezko gaztelu bat, altzairuzko txirrista batekin; txirrista bat txikienentzat; eskalada-dorreak, oreka-motzondoak…
Jolasguneaz gain, egungo argiteria elektrikoa handitu egingo da bi argi-puntu berrirekin, eta iturri berri bat jarriko da.
Parke hori eraikitzeko obra laster aterako da lizitaziora, eta gehienez 153.319,11 euroko prezioa izango du.