“Gure ikerkuntzaren produktua euskaraz lan egitetik sortzen dugu” Amaia Iza, CEIT

Irabazi asmorik gabeko ikerkuntza zentroa da CEIT, BRTA sareko kidea. Bere lan-esparru nagusien artean Materialak eta Fabrikazioa, Garraioa eta Energia, Informazioa eta Komunikaziorako Teknologiak, eta Ura eta Hondakinak daude. Bere azken urteotako erronkarik garrantzitsuenetakoak industria siderurgikoaren trantsizio digitalean eta jasangarrian kokatzen dira. Amaia Iza, Prozesaketa termomekaniko taldeko ikertzailea eta burua dugu solaskide elkarrizketa honetan.

‘Datu industrial errealetan oinarritutako ereduak garatzen ditugu. Horrekin adierazi nahi dut oso estua dela enpresekin daukagun lotura: beraien informazioa behar dugu guk gure modeloak garatu ahal izateko’ esan digu Amaiak eta gaineratu du ‘Ikerketa aplikatuaz gain oinarrizko ikerketa ere egiten dugu, ezagutza sortu behar dugulako eta horregatik, enpresez gain, harreman handia daukagu beste instituzioekin, zentro teknologikoekin, unibertsitateekin.’

Amaia Izak zuzentzen duen Prozesaketa Termomekanikoko taldean gehiengoa euskalduna da eta ikerkuntzan euskaraz ari dira egunero ‘gure ikerkuntzaren produktua euskaraz lan egitetik sortzen dugu. Munduan zehar ezarrita dauzkagun soluzio horiek altzairutegietan eta altzairuaren transformazioko plantetan, euskaraz egindako lanaren eta ikerkuntzaren ondorio handia dira.’

INDEUS plataformako kide bezala Amaia Izak azpimarratu du ‘hainbeste enpresa euskaldun INDEUSen egoteak gu ere mugiarazten gaitu. Enpresa horiek gure bezeroak ere badira asko, beraz horiek mugitzen ari baldin badira hizkuntzaren arloan guk ere derrigor mugitu egin beharko dugu.’

Indeus Elkarrizketak SPRIk abiarazitako egitasmoa da Indeus, Industriaren Euskal Plataformako kide diren enpresa, elkarte eta zentro teknologikoak ezagutzera eman eta industrian euskararen erabilerari buruzko gogoeta egiteko.