Denis Itxasok: “Zoritxarrez, gaur egun gehiago jabetzen gara lurraldeko desordenak, praxi txarrak edo planifikazio eskasak dakartenaz, baita horren ondorio kaltegarriez ere”

Gaur inauguratu da Vitoria-Gasteizen Euskal Hiriaren hogeita hirugarren edizioa, Eusko Jaurlaritzako Etxebizitza eta Hiri Agenda Sailak Nazio Batuen Habitat programarekin lankidetzan antolatutako kongresua. Denis Itxaso sailburuak, hasierako hitzaldian, foro horren garrantzia azpimarratu du hiri- eta lurralde-plangintzari buruzko hausnarketarako gune gisa. Izan ere, “zoritxarrez, gaur egun gehiago jabetzen gara lurraldeko desordenak, praxi txarrak edo planifikazio eskasak dakartenaz, baita horren ondorio kaltegarriez ere”.

Bestalde, Maider Etxebarriak Gasteizek hiria berroneratzeko egindako ahaleginak azpimarratu ditu, Zaramaga bezalako auzoetan egindako lanak adibidetzat hartuta. Alkateak proiektu hauen garrantzia azpimarratu du, Gasteiz “egungo erronkei eta gizarte- eta ingurumen-beharrei aurre egiteko planifikatutako hiriaren adibide ezin hobea” dela adieraziz. Era berean, beste erakunde batzuekin, besteak beste Eusko Jaurlaritzarekin, egiten ari diren lankidetzak nabarmendu ditu, funtsezko eremuetan uholde-arriskuei aurre egiteko, muturreko fenomeno klimatikoen aurrean hiriaren erresilientzia indartuz.

“Datutik Lurraldera” goiburuarekin, EuskalHiriaren edizio honek Big Dataren erabilera hartu du ardatz, lurralde-plangintza eraginkorragoa eta zehatzagoa lortzeko tresna eraldatzaile gisa. Itxasoren arabera, datuak hiri-plangintzan sartzeak “aukera eman du lurralde erresilienteagoak, jasangarriagoak eta bertako biztanleentzat bizi-kalitate handiagokoak sortzeko”. Sailburuak azpimarratu duenez, “lurralde-antolamendua herritarrentzat urruneko gaia izan daitekeen arren, horren ondorioak agerian geratu dira guztion eguneroko bizitzan eta ingurunean”. Hondamendi naturalak eta ingurumen-arazoak gero eta nabarmenagoak diren testuinguru globalean, Itxasok hirien eta lurraldearen plangintzan ondo oinarritutako jardunbide arduratsuen beharra azpimarratu du.

Azkenik, Denis Itxasok dei egin die bertaratuei hiriak komunitate-, aniztasun- eta konplexutasun-balioez “kutsatzeko”, eta espero du kongresu honek katalizatzaile gisa balioko duela Euskadik bere identitatea eta ondarea babestuko dituen lurralde-eredu baterantz aurrera egiten jarrai dezan, eta, era berean, etorkizuneko erronkei aurre egiteko prest egon dadin. Erronka horien artean, klima-aldaketaren benetako inpaktua nabarmendu behar da.

Ildo beretik mintzatu da Etxebarria ere, eta Gasteizek duen konpromisoa azpimarratu du Green Capital gisa duen ondarearekin. Izan ere, bereizgarri horrek, bere hitzetan, “ekimen jasangarriak babestu eta bultzatzera behartzen du, ingurumenaren babesean Gasteiz hiri aitzindaria izaten jarraitzeko”. Alkateak berretsi du erantzukizun hori funtsezkoa dela hiriak jasangarritasunean eta bizi-kalitatean erreferente izaten jarrai dezan, klima-aldaketaren erronkei aktiboki aurre eginez.

Datu Espazialetako Azpiegituren III. GeoEuskadi Kongresua & Jornadas Ibéricas de Infraestructuras de Datos Espaciales jardunaldiarekin batera antolatutako EuskalHiria kongresua sendotu egin da, adituen, profesionalen eta tokiko agintarien arteko elkarrizketa eta elkarlanerako plataforma gisa. Hainbat saiotan, parte-hartzaileek aztertuko dute nola lagundu duten aurrerapen teknologikoek Euskadiko hiri-diseinuan jasangarritasun, aniztasun eta erresilientzia handiagoa lortzen.