Euskadi, Europako funtsen betearazpenean buruan

PRUEBA

Euskadi Europako funtsen betearazpenean buruan dago, orain arte deitutakoen % 71,8 exekutatu baititu, eta estatuko tasa baino askoz datu altuagoa du, % 57,5ekoa betearazpen-maila baitu. Soilik Galiziak gainditzen du % 72ko tasarekin. “Guztiok egiten ari garen ahaleginak emaitzetan ari dira gauzatzen”, ziurtatu du gaur Mikel Torres Lehendakariordeak eta Ekonomia, Lan eta Enplegu sailburuak Zumarragan, Berreskuratze eta Erresilientzia Mekanismoko funtsak eraldatzeko, modernizatzeko eta iraunkortasunean aurrera egiteko hobekien aprobetxatu dituen euskal udalerrietako batean.

Mikel Serrano alkatearekin eta tokiko gobernu-taldeko kideekin izandako bileran, Next Generation EU funtsekin finantzatutako hainbat proiekturen gauzatze-maila ezagutzeko, Torres Lehendakariordeak defendatu du Euskaditik zenbat eta funts gehiago kudeatu «hobe» dela, eta fory aldundiei eta udalei kudeatzeko «banaketa bat» egitearen alde agertu da.

2021ean Next Generation EU programa martxan jarri zenetik, Euskadira 2.700 milioi euro iritsi dira: 1.250 milioi Eusko Jaurlaritzak zuzenean kudeatu ditu sektoreko konferentzien edo zuzeneko emakiden bidez, eta jasotako gainerako laguntzak administrazio zentralak kudeatu ditu, Euskadin errotutako enpresentzako edo gure lurraldean jarduera garatzen duten enpresentzako lizitazio, kontratu eta dirulaguntzen bidez.

“Garrantzitsua da baliabideak eta dedikazioa bideratzea funts horiek guztiak aprobetxa daitezen, eta Euskadiko garapen ekonomikoan eragina izan dezaten”, azpimarratu du Torresek. Eusko Jaurlaritzak kudeatutako funtsetatik 260 milioi euro baino gehiago foru-aldundiei, udalei eta mankomunitateei transferitu zaizkie, proiektuak zuzenean kudea ditzaten. Zumarragan, adibidez, 8,4 milioi euro baino gehiago lortu dituzte hainbat deialdiren bidez.

Erresilientzia Autonomikoko Funtsak

Berreskuratze eta Erresilientzia Mekanismoko funtsen erdigunera iritsi arren, oraindik ere Europako partidak iristeko daude. Torres Lehendakariordeak adierazi du Eusko Jaurlaritzak “lanean” jarraitzen duela Euskadik laguntza horiek jaso ditzan; hala nola, 20.000 milioi euro dituzten Erresilientzia Autonomikorako Funtsetatik.

Funts horiek maileguak dira, eskualdeko proiektu publiko eta pribatuak baldintza onuragarrietan eta epe luzera finantzatzeko. Europatik finkatu diren lehentasunezko arloetako proiektuetara bideratuko dira: etxebizitza soziala eta eskuragarria, garraio iraunkorra, industriaren eta ETEen lehiakortasuna, I+G+B, turismo iraunkorra, zainketen Ekonomia, eta uren eta hondakinen kudeaketa.

Horretarako, dagoeneko hiru finantza-tresna aktibatu dira Europako Inbertsio Bankuaren eta Kreditu Ofizialeko Institutuaren bidez. “Finantzaketa-mekanismo garrantzitsu honen helburua da inbertsio-proiektu publiko zein pribatu bat ere ez dadila egin gabe geratu, finantzaketarik ez dagoelako”, gaineratu du Torres Lehendakariordeak.