Gipuzkoako Aldundiak lehen sektorearen belaunaldi-aldaketa eta modernizazioa bultzatuko ditu, bi laguntza deialdi berrirekin

Foru Gobernuak bi deialdi berri onartuko ditu bihar Diputatuen Kontseiluan Gipuzkoan lehen sektorearen garapena bultzatzeko, nekazaritza-ustiategien modernizazioa indartuz eta gazteak sektorera sartzea erraztuz. Honela,  “lurraldearentzat funtsezkoa den sektore baten iraunkortasuna eta lehiakortasuna bermatzen lagundu nahi da”, Irune Berasaluze foru bozeramaileak nabarmendu duenez. Bi programek landa-garapen orekatuaren aldeko «apustu irmoa» islatzen dute, «lehen sektorearen jasangarritasun ekonomikoa eta ingurumen-iraunkortasuna funtsezkoak baitira». «Ekimen horiek, nekazaritza-sektorean lan egiten duten pertsonen ustiategiak eta bizi-kalitatea hobetzeaz gain, lurraldeko landa-ingurunearen ingurunea, biodibertsitatea eta gizarte-ehuna mantentzeko funtsezko zeregina ere bermatzen dute».

Alde batetik, 2025eko nekazaritza-ustiategietan inbertitzeko laguntzen deialdia onartuko da, guztira 3,6 milioi euroko zuzkidurarekin, eta ustiategien bideragarritasun ekonomikoa hobetzea du helburu, teknologia berritzaileak eta prozesu eraginkorragoak bultzatuz. «Programaren lehentasunen artean belaunaldien arteko erreleboa bultzatzea dago, sektorea belaunaldi berrientzat erakargarria izatea bermatuz eta nekazari gazteen sarrera sustatuz», azaldu du Berasaluzek. Laguntzen helburua da, halaber, nekazaritzako produktuen kalitatea eta osasuna bermatzea, merkatuaren eskakizunekin eta Europar Batasuneko araudiarekin bat eginez.

Bestalde, Gobernu Kontseiluak 2025eko deialdia ere onartu du, nekazaritza sektorean sartu nahi duten 40 urtetik beherakoei zuzendutako nekazari gazteak ezartzeko. Ekimen honek 1,12 milioi euroko aurrekontua du guztira. Programaren helburua da gazteek nekazaritza-ustiategien kudeaketarako sarbidea erraztea, eta finantza-laguntza eskaintzea, azpiegituretan, ekipamenduetan eta produkzio-prozesuetan beharrezkoak diren inbertsioei ekiteko.

Berasaluzeren arabera,» laguntza horiek ez dira laguntza ekonomikoa bakarrik, baizik eta Gipuzkoaren etorkizunean apustu estrategikoa egitea, kalitatezko elikagaiak ekoizteko, landa-ingurunea zaintzeko eta belaunaldi berrientzako aukerak bermatzeko». Neurri horiek Gaztenek edo Baserritar Mixto Profesionala programa bezalako ekimenekin osatzen dira, landa-eremuko prestakuntza eta garapen profesionala sustatzeko.

Zarauzko saihesbidea, lizitaziora

Diputatuen Kontseiluak argi berdea eman dio Zarauzko saihesbide berriaren obren lizitazioari, 12.019.745, 64 eurokoa (IVA barne) eta 18 hilabeteko egikaritze-epearekin, obraren plangintzan zehaztutakoaren arabera. Horrela, foru bozeramaileak baieztatu duenez, “Zarautzen hainbeste espero duten obraren hasierara hurbiltzen gara”. Izan ere, jarduketa honen helburua da herrigunea zeharkatzen duen N-634 errepidetik industria-jardueraren trafikoa deskargatzea eta Zarautz hegoaldeko auzuneak hobeto komunikatu ahal izatea. “Horrek eraldaketa handia eragingo du herrian”, esan du Berasaluzek.

Azpiegitura berriak bi errei izango ditu (noranzko bakoitzean bat), eta 1.560 metroko luzera izango du, Astiko biribilgunetik (AP-8 irteera) Eta Frantsesbidea kalearekin bat egiten duen arte. Bide berria Astiko egungo biribilgunean hasiko da, adar berriari lekua emateko egokituko dena, eta, hortik, adar berri hau Bidegiko instalazioen atzetik igaroko da, bi noranzkorekin, eta autobidea zeharkatuko du, Sarobeaundiraino. Bertan, biribilgune berri bat eraikiko da, eta han AP-8 autobideko irteera-trafikoek bat egingo dute, mendebaldetik (Bilbo) datozenak.  Bideak Buztinzuriko biribilguneraino jarraitzen du, eta bertan adarretako batek saihesbidea eta Zarauzko hirigunea lotuko ditu, egungo autobide azpiko pasabidetik. Bidea ‘T’ formako bidegurutze batean amaitzen da, Frantsesbidearen parean, eta bertan bigarren konexio bat izango du hirigunearekin eta Errotaberri eta Abendaño industrialdeekin. Horrela, Zarautzen trafikoen banaketa hobetzea lortuko da, batez ere industrialdeetan jatorria edo helmuga duten ibilgailu astunei dagokienez.

Aldundiaren egutegiaren banaketa

Foru bozeramaileak iragarri duenez, argazki irabazleen aukeraketaren ostean, datorren asteartean, abenduak 10, hasiko da 2025eko foru egutegiaren banaketa, eta aurten mugarria izango da banaketan. «Lehen aldiz, aurrekaririk gabeko hedapena egingo da, egutegia lurraldeko udalerri guztietara iritsiko dela ziurtatzeko», adierazi du Berasaluzek.

Apustu honek egutegiak piztu ohi duen interes handiari erantzuten dio, orain arte Donostiako Gipuzkoa Plazako Foru Jauregian banatu izan dena. Berasaluzek azaldu duenez, “banaketa-puntu gehiago jartzeko herritarrek urtero egiten duten eskaeraren aurrean, Aldundia eskualdeka ere banatzen hasi zen». Aurten, horri entzunez, beste urrats bat eman da eta banaketa lurralde osoan egingo da.

«Aurten oso berezia den egutegi berria ahalik eta gehien zabaltzea nahi du, Gipuzkoaren nortasuna islatzen baitu». Gipuzkoako Foru Aldundiak eta Argazkilari Elkarteak antolatutako aurtengo argazki lehiaketak Gipuzkoa 1.000 urte  izan du lema gisa, eta omenaldia egin nahi izan zaio ‘Gipuzkoa’-ren lehen aipamen dokumentalari, gipuzkoarrei lurraldearen iraganari, orainari eta etorkizunari buruz duten ikuspegia islatzera gonbidatuz. «Horregatik, aurten lurraldeko txoko guztietara iritsiko gara», adierazi du Irune Berasaluze foru bozeramaileak.

40.000 ale inprimatuko dira, eta udalerri bakoitzeko biztanleriaren arabera banatuko dira. Gainera, egutegia Gipuzkoako foru eraikinetan eta egoitzetan egongo da eskuragarri. Bederatzi egunez, bi furgonetak lurraldea zeharkatuko dute, banaketa bermatzeko.

Egutegiari buruzko informazio guztia eta egun eta udalerrien araberako banaketaren xehetasunak www.gipuzkoa.eus/eu/egutegiak webgunean kontsulta daiteke.

Berasaluzek eskerrak eman nahi izan dizkie Gipuzkoako Argazkilari Elkarteko kideei lehiaketaren antolakuntzan izan duen inplikazioarengatik eta aurtengo edizioan parte hartu duten 272 pertsonei. 644 argazki aurkeztu dira aurten lehiaketara. Gainera, abenduaren 16an argazki-elkartearen egoitzan, saritutako irudiekin erakusketa bat inauguratuko da.

«Oso harro gaude proiektu kolektibo honen emaitzarekin. Aurkeztutako argazkien sormenak eta kalitate teknikoak Gipuzkoaren aniztasuna eta aberastasuna islatzen dute, eta orain inoiz baino gehiago guztiekin partekatu nahi dugu, oso egutegi berezia baita», gaineratu du Berasaluzek.