Ertzaintzak bi pertsona atxilotu ditu Gasteizen indarkeria erabiliz egindako lapurreta bat ikertu ondoren.

Ertzaintzako agenteek 33 eta 25 urteko bi gizon atxilotu zituzten atzo, asteartea, goizean, joan den abenduaren 22an Gasteizko pub batean indarkeria erabiliz egindako lapurreta leporatuta.

Ertzaintzak joan den abenduan hasi zuen ikerketa, gizon bati, Gasteizko Arriagako Atea kaleko ostalaritza-lokal batean zegoenean, indarkeria erabiliz lapurreta egin ziotela jakin zuenean. Salaketan jasotakoaren arabera, biktimari bizkarretik, besotik eta lepotik heldu zioten bi pertsonak, eta oreka galdu eta lurrera erori zen lokalean. Gizonetako batek eusten zion bitartean, besteak mugikorra kendu zion poltsikotik eta, jarraian, ustezko lapurrek presaka alde egin zuten. Dena oso azkar gertatu zenez, biktimak ezin izan zuen lapurretaren egileen ezaugarri fisikoei buruzko datu askorik eman, baina adierazi zuen lapurtutako gailu mugikorra gama altuko telefono bat zela, 1.200 eurotik gorako balioa zuena, eta haren IMEI zenbakia eman zien ertzainei.

Ikerketarekin jarraituz, hurrengo egunetan agenteek deklarazioa hartu zieten gertakariaren bi lekukori.  Bildutako datu horietan oinarrituta, Gasteizko Ertzain-etxera atxikitako instrukzio-taldeak pertsonen aurkako delituengatik Ertzaintzak erresinatuta zituen eta lekukoek emandako ezaugarri fisikoen antzekoak zituzten pertsonen 12 argazkiz osatutako konposizio bat prestatu zuen.  Era berean, ikerketaren arduradunek gogoratu zuten lapurretaren aurreko egunetan, Ertzaintzaren patruila batek deklaratzaileek emandako ezaugarri fisikoekin bat etor zitezkeen bi pertsona identifikatu zituela.

Bildutako datuei eta egindako ikerketari esker, Ertzaintzak lapurretaren ustezko bi egileak identifikatu zituen, biak asteburuetan, noizean behin, ostalaritza-lokalean ibiltzen direnak, eta aurrekariak dituztenak pertsonei lapurreta egiteagatik.  

Biktimak lapurretaren egile gisa identifikatu ondoren, atzo, asteartea, goizean, bi gizonak, 33 eta 25 urtekoak, atxilotu ahal izan zituzten, indarkeriaz eta larderiaz lapurreta egitea leporatuta.

Atxilotuek polizia-egoitzan jarraitzen dute, beharrezko eginbideak amaitu ondoren agintari judizialaren eskuetan noiz jarriko zain.