Bi pertsona atxilotu dituzte Portugaleten eta Santurtzin iruzurra eta dokumentuak faltsutzea leporatuta

Ertzainek 30 urteko gizon bat eta 22 urteko emakume bat atxilotu zituzten atzo arratsaldean Santurtzin eta Portugaleten, iruzur-delitua eta dokumentuak faltsutzearen delitua leporatuta. Bikotea sare sozialen bidez jartzen zen partikularrekin harremanetan, eta ustezko gama altuko telefonoak, berez imitazioak zirenak, saltzen zizkien eta, dirutan ordaintzen zutenean, dokumentu eta faktura faltsuak ematen zizkien.

Muskizeko Ertzain-etxeak joan den apirilean jarri zuen abian ikerketa, iruzur baten biktimek jarritako sei salaketa jaso ondoren. Adierazten zutenez, aurreko egunetan ustez gama altukoak ziren telefono mugikorrak erosi zituzten, dirutan 700 eta 1.000 euro artean ordainduta, eta gero egiaztatu ahal izan zuten faltsuak zirela.  

Kasu guztietan, biktimek adierazi zuten sare sozialen bidez jarri zirela saltzaileekin harremanetan, eta gero Santurtziko leku ezberdinetan elkartzen zirela kasu batzuetan gizon batekin eta beste batzuetan emakume batekin, telefonoak jasotzeko. Ondoren, konturatu ziren erosi nahi zuten jatorrizko modeloaren imitazioak zirela eta eman zizkieten fakturak eta dokumentazioa faltsuak zirela.

Egindako ikerketen ondorioz, ustez iruzur egin zuen bikotea identifikatu zuten. Biek aurrekari ugari dituzte antzeko delituengatik, eta lehenago ere atxilotu izan dituzte delitu horiengatik. Egoera horren aurrean, eta beharrezko egiaztapenak egin ondoren, atzo arratsaldean atxilotu zituzten iruzur-delitu eta dokumentuak faltsutzearen delitu bana leporatuta.  

Atxilotuak, 30 eta 22 urtekoak, polizia-egoitzara eraman zituzten beharrezko izapideak egiteko, gero Agintaritza Judizialaren aurrera eramateko.

Jaitsi Argazkia