Andoaingo etxe batean lapurreta egiten saiatu ondoren atxilotu dute

Ertzainek gizon bat atxilotu zuten atzo lapurreta-delitua leporatuta, Andoaingo Sorabilla auzoko etxe batean lapurreta egin ondoren. Etxeko bizilagunak ustekabean harrapatu zuenean, esprai narritagarri batekin busti eta ihes egin zuen. Handik ordu batzuetara atxilotu zuten, eta auto batean lapurreta egitea eta bizikleta bat lapurtzea ere leporatu zioten.

Lapurreta atzo goizaldean gertatu zen Andoaingo Sorabilla auzoko etxe batean. Pertsona bat leiho bat behartuta sartu zen barrura. Zaratak bertan bizi den pertsona esnatu zuen, eta lapurrak, ikusi egin zuela konturatu zenean, esprai narritagarri batekin busti zuen biktima eta ihes egin zuen.

Etxebizitzara joan ziren Ertzaintzaren baliabideek, miaketa egin ondoren, egiaztatu zuten lapurrak telefono mugikorra eta eskularru batzuk galdu zituela ihesi zihoala.  Horrez gainera, ikusi ahal izan zuten etxe ondoan aparkatuta zegoen ibilgailu bat behartuta zegoela.

Ertzaintzak handik ordu batzuetara atxilotu zuen lapurretaren ustezko egilea, tren-geltoki batean pertsona bat erabiltzaileak gogaitzen ari zela jakin ondoren. Patruilak bertaratu zirenean, egiaztatu zuten gizonak ez zeramala dokumentaziorik eta bizikleta bat zuela. Horrek agenteen sumoak piztu zituen, eta egiaztatu ahal izan zuten lapurreta egindako lekuan aurkitutako mugikorra harena zela, eta aurkitutako eskularruak behartutako ibilgailutik lapurtu zituela.  Gainera, egiaztatu ahal izan zuten gizonak zuen bizikleta ordu batzuk lehenago lapurtu zutela Andoainen.

Ebidentzia horien aurrean, agenteek susmagarria atxilotu zuten etxe batean eta auto batean lapurreta egitea eta bizikleta bat lapurtzea leporatuta. Polizia-aurrekariak dituen 26 urteko atxilotua Ertzaintzaren egoitzara eraman zuten dagozkion eginbideak irekitzeko eta, ondoren, epailearen aurrera eramateko.