Donostiako Udala ahalegin handia egiten ari da Parte Zaharreko soinu-ingurunea hobetzeko

Donostiako Udalak Parte Zaharreko soinu-ingurunea hobetzeko konpromisoa areagotzen jarraitzen du; izan ere, auzo hori hiriko eremu enblematikoenetako bat da, eta, akustikaren ikuspegitik, baita eremu tentsionatuenetako bat ere. Ingurumen Sailak, auzoko bizilagunek eskatuta, Alde Zaharraren soinu-inpaktuari buruzko azterlan bat egin du, egunez zein gauez hainbat neurketa eginez. Txosten horri esker, gune kritikoak identifikatu ahal izan dira, eta baieztatu egin da auzoko zarataren arazoa gauez gertatzen dela, eta, zehazkiago, asteburuan.

Udalak hainbat neurri hartu ditu azken boladan egoera horri aurre egiteko. Zeharkako jarduketekin egin du. Hainbat atal inplikatu ditu eta arazoari hainbat ertzetatik heldu dio: hiri-zerbitzuen kudeaketa, turismo- eta ostalaritza-jardueraren erregulazioa, sentsibilizazio- eta hezkuntza-kanpainak, herritarrentzako zuzeneko laguntzak eta datuetan eta ebidentzia zientifikoan oinarritutako plangintza.

Aniztasuneko, Inklusioko eta Ingurumeneko zinegotzi ordezkari Iñigo García Villanuevaren hitzetan, «neurri horiek guztiak denboran zehar egindako lan serio eta jarraitu baten emaitza dira; horren barruan, parte hartzeko prozesuak egin dira, Parte Zaharreko bizilagunei modu aktiboan entzuteko espazioak sortu dira eta udal-atal askok modu koordinatuan lan egin dute. Badakigu ez dagoela konponbide magiko edo errazik, baina etengabeko hobekuntzan sinesten dugu, eta datuetan eta herritarren benetako bizipenetan oinarritutako erabakiak hartzearen garrantzian».

Jarduera-ildo nagusiak

• Hondakinen kudeaketa: Jarduketa-ildo nagusietako bat kale-garbiketak eta hiri-hondakinen bilketak eragindako inpaktu akustikoa murriztea izan da. Parte Zaharrean, bilketa egunez egiten da beti; hain zuzen ere, hiriko auzo horretan bakarrik aplikatzen da neurri hori, gauez eragozpenik ez sortzeko. Gainera, laster ibilgailu elektrikoak eta garbitzeko makina isilagoak sartuko dira gaueko zerbitzuan, hala nola soinu-igorpen txikiko erratz-makinak eta bateriaz elikatutako hosto-haizagailuak. Eraldaketa hori modu planifikatuan egin da, zerbitzuen eraginkortasuna ebaluatuz, proba pilotuen bidez. Proba horiek emaitza onak izan dituzte, eta, horri esker, esku-hartzearen maiztasuna murriztu ahal izan da, ingurunearen garbitasuna arriskuan jarri gabe.

• Gaueko aisialdiko zarata: Aldi berean, Udalak soinu-eragozpenak sortzen dituzten jarduerak arautzen jardun du; zehazki, gaueko aisialditik eratorritakoak. Osasun Publikoaren atalak Parte Zaharreko 11 puntutan egin zituen neurketak, bi kanpainatan: bata udan (abuztua) egin zuen, eta bestea neguan (azaroa). Horietatik ondorioztatu da zarata-arazo bat dagoela, batez ere asteburu gauetan eta areago udan. Joan de Bilbao eta Fermin Calbetón kaleak dira kaltetuenak, 10 dezibeletan gainditzen baitituzte kalitate akustikoaren helburuak (KAH). Eta, neurri txikiagoan, Konstituzio plaza, Esterlines, Kale Nagusia eta basilika ingurua, KAHak 5-10 dezibeletan gainditzen dituzte eta. Zarataren iturri nagusia gizakiak dira.

• Terrazen ordenantza: Gaueko aisialdiak dakarren egoera hori arintzeko, terrazen ordenantza berria behin betiko onesteko prozesuan dago. Ordenantza horrek ordutegiak murriztuko ditu hainbat eremutan, hala nola Parte Zaharrean. Eremu horretan egiten diren ekitaldi publikoak ere mugatu dira, eta are zorrotzago gainbegiratu da ostalaritzako lokaletan araudia betetzen den. Azken bi urteetan, Osasun eta Ingurumen Atalak 178 zehapen izapidetu ditu eta 23 neurri zuzentzaile ezarri dizkie Parte Zaharreko lokalei, zaratarekin lotutako arrazoiengatik.

• Turista-taldeak: Turismo-kudeaketa ere berrikusi da. 2024ko apirilaz geroztik, turista-talde antolatuek ezin dituzte 25 pertsona baino gehiago izan; neurri hori aitzindaria da Euskadin, eta espazio publikoaren gaineko presioa murriztea du helburu. Gainera, iaztik debekatuta dago bisita gidatuetan bozgorailuak eta megafonia-sistemak erabiltzea, Turismo, Ingurumen eta Udaltzaingoaren artean adostutako jardunbide egokien dekalogo baten arabera.

Neurri horiez gainera, duela bi hamarkada baino gehiagotik laguntza ekonomikoak ematen dira etxebizitzak intsonorizatzeko. 2001az geroztik, Udalak hainbat ordenantza onetsi ditu Parte Zaharreko etxebizitzen isolamendu akustikoa hobetzeko dirulaguntzak emateko, bai eta leihoak eta beste elementu arkitektoniko batzuk aldatzeko ere.