Euskal merkataritzaren sektoreko enpleguak eta salmentek gora egiten jarraitu dute 2024an

Turismo, Merkataritza eta Kontsumo Sailaren mende dagoen Enfokamer Euskadiko Merkataritzaren Behatokiak, Euskal Ganberen laguntzarekin, 2024ko Euskal Merkataritzaren Egitura Txostena argitaratu du.

Euskadin 33.693 merkataritza-establezimendu daude guztira, hiru talde handitan banatuta: automobilgintzako  emakidadun, tailer eta ordezko denden taldeko 3.027 establezimendu, merkataritzako eta handizkako bitartekarien 9.350 establezimendu, automobilgintzakoak izan ezik, eta txikizkako 21.316 saltoki, automobilgintzakoak izan ezik.

Guztizko merkataritza-dentsitatea 15,11 saltokikoa da mila biztanleko: 9,56 txikizkako saltokiak dira, 4,19 handizkako saltokiak eta 1,36 automobilgintzaren sektorekoak. Merkataritza-dentsitateak behera egin arren, enplegua hazi egin da merkataritzaren sektorean, aurreko urtean bezala.

EAEko merkataritza osoan Gizarte Segurantzako afiliatuen kopurua 135.234 pertsonara igo zen 2024an, eta horrek esan nahi du afiliatuen kopuruak gora egin duela aurreko urtearekin alderatuta (0,6).

Salmentak

EAEko merkataritzaren sektore osoaren salmenta-zifrek gora egin zuten 2023an, 2021etik izandako hazkundearen ildoari jarraituz. Argitaratutako azken datuek, 2023koek, % 2,97ko hazkunde-tasa dute 2022koekin alderatuta, eta 42.141,3 milioi euroko salmenta-zifrara iritsi dira.

Talde handien arabera, salmenten hazkunderik handiena ibilgailu motordunak eta motozikletak saltzeko eta konpontzeko jarduerak biltzen dituen taldeak izan du, % 15,97ko igoerarekin; sektore osoko salmenten % 8,8.

Handizkako merkataritzaren eta bitartekarien salmentei dagokienez, ibilgailu motordunena eta motozikletena izan ezik, 2023an -%0,02ko jaitsiera txikia izan zuen, eta euskal merkataritzako sektore osoaren salmenten % 56,3 izan zen. Txikizkako merkataritzaren hazkundea % 5,04koa izan da, guztizkoaren % 34,9.