Barakaldon gizon bat atxilotu dute Getxoko udalerrian aparkatuta zeuden zortzi ibilgailuri su emateagatik

Ertzaintzako eta Getxoko Udaltzaingoko agenteek elkarlanean ikertu dituzte abuztuan udalerrian zortzi ibilgailuri eragin dieten suteak, eta, ikerketa horren ondorioz, ustezko egilea, 56 urteko gizona, atxilotu dute bart gauerdian, Barakaldon aurkitu ondoren.

Ikertu dituzten ibilgailuetako suteak abuztuaren 9an, 22:30 aldera, hasi ziren Getxon, Algorta auzoko Telletxe kalean. Auto baten aurreko aldean piztutako su batek kalteak eragin zituen autoan bertan eta inguruko beste ibilgailu batzuetan. Handik bi egunera, abuztuaren 11n, egoera bera errepikatu zen udalerriko Amezti kalean goizaldeko 04:20an. Kasu horretan beste auto batean izan zen sua eta batez ere aurreko gurpilen aldeari eragin zion. Suhiltzaileek, Getxoko Udaltzaingoak eta Ertzaintzak erantzun zieten abisuei, eta atestatu bana instruitu zituzten ustezko kalte-delitu batengatik.

Hilaren 15ean, 20:00ak aldera, Getxoko Ondategi kaleko beste auto batean izan zen sua. Kasu horretan, sua pneumatiko batean hasi zen eta aparkatuta zegoen beste ibilgailu bati ere eragin zion.

Hurrengo egunean, abuztuaren 16an, beste hiru sute izan ziren. Gaueko 00:12etan Getxoko Torrene kalean aparkatuta zegoen auto baten aurreko ezkerreko gurpilean hasi zen sua, eta udaltzainek su-itzalgailu batekin itzali ahal izan zuten. Handik pixka batera, beste herritar batek jakitera eman zuen handik hurbil, Illeta kalean, beste auto bat sutan zegoela. Udaltzaingoko eta Getxoko Ertzain-etxeko patruilek modus operandi bera ikusi zuten ekintza horretan, sua aurreko ezkerreko gurpilean hasi baitzen.   

Egun berean, goizaldeko 02:00ak aldera, suhiltzaileek beste su bat itzali zuten Telletxe kaleko aparkaleku publiko bateko hiri-hondakinen edukiontzi batean. Antza denez, edukiontziaren ondoan zegoen koltxoi batean hasi zen sua. Sua azkar itzali izanari esker, inguruan aparkatuta zeuden ibilgailuek ez zuten kalterik izan.

                       Baterako lana eta ustezko egilea atxilotzeko agindua

Hipotesi gisa hartuta gertaera guztiak, ustez, pertsona berak eragin zituela, udaltzainek eta ertzainek zaintza- eta ikerketa-lanak hasi zituzten, eta, herritarren laguntzarekin, egitate horien ustezko egilea, 56 urteko gizona, identifikatu zuten, eta atxilotzeko polizia-agindua eman zuten.

Bart gauerdian, Barakaldoko Udaltzaingoak identifikatu du susmagarria bertako saltoki batean ustez lapurreta egiteagatik, eta Ertzaintzari pasa dio abisua, ibilgailuetan nahita eragindako suteen ondoriozko kalteen delitu jarraituagatik atxilotzeko agindua indarrean zegoela egiaztatu ondoren. Ertzaintzaren patruilak atxilotu eta Sestaoko Ertzain-etxera eraman du.

Egitate horiengatik irekitako atestatuetako eginbideak amaitu ondoren, atxilotua agintari judizialaren eskuetan jarriko dute.

Ertzaintza, Udaltzaingoarekin batera, ikertzen ari da atxilotua azken asteetan Getxoko hiri-altzarietan eragindako beste sute batzuetan inplikatuta ote dagoen.