Lehendakariak Euskadi-Kanariak aliantza indartu du Tenerifen, Pedro Sanchezen gobernuari migrazioa kudeatzeko egiturazko plan bat exijitzeko

• Euskadik eta Kanariek beren migrazioaren errealitateari buruzko esperientziak trukatu dituzte
• Imanol Pradalesek migrazioaren errealitateari erantzun ordenatu, bidezko eta humanitario batekin aurre egiteko premia nabarmendu du, pertsonak beti erdigunean jarriko dituena erantzunarekin
• “Open Armsen lana kritikatzen dutenei hona etortzeko eta hemen bizitzen ari den dramari aurpegia eta begiak jartzeko gonbita egiten diet”, esan du lehendakariak

“Migrazioa tamaina eta konplexutasun handiko fenomenoa da. Ez dira nahikoa adabakiak eta borondate ona: plan integral bat behar da, erantzun ordenatu bat, erregularra eta bidezkoa”. Lehendakariak Open Arms laguntza humanitarioko ontzira egindako bisitan esandako hitzak dira. Itsasontziak abuztuan atrakatu zuen Santa Cruz Tenerifekoko portuan, eta Kanariar Uharteek bizi duten migrazioaren errealitatea ezagutzea eta, aldi berean, Euskadik bizi duena helaraztea helburu zuen goiz baten amaiera izan da.

Hala, lehen orduan, Imanol Pradales Euskadiko eta Kanarietako GKEekin bildu da ‘Ipar- eta Hego-mugak: migrazio-erronken aurrean erantzunak indartzen’ izeneko jardunaldian, Kanarietako Gobernuko Lehendakaritzaren egoitzan, Fernando Clavijo presidentearekin batera.

Ibilbide bikoitzeko topaketa izan da. Izan ere, baliagarria izan da bertatik bertara ezagutzeko Afrikako hainbat herrialdetatik etorritako migratzaileak Kanariar uharteetako itsasertzetara iristean haiei arreta ematen dieten GKEen eguneroko errealitatea; eta, era berean, Kanarietan lan egiten duten erakundeek entzuteko Euskadin bizi den egoera, migratzaileak Irungo mugaraino iristen direlako.

Bileraren ondoren, lehendakaria Nerea Melgosa Ongizate, Gazteria eta Erronka Demografikoko sailburuarekin joan da Santa Cruz Tenerifekoko Santa Cruz Tres adingabeen zentrora, eta bertan in situ egiaztatu du nola lan egiten den migrazioaren alde kalteberenetako bati arreta emateko, hala nola bakarrik dauden adingabeei. 2023ko abenduan ireki zen zentro hori, 80 pertsona artatzeko, eta 12 urtetik gorako 120 okupatzaileren kopurua gainditu du dagoeneko. Horiek, batez ere, Saharaz hegoaldeko herrialdeetatik etorritakoak dira.

Azkenik, Imanol Pradalesek Open Arms laguntza humanitarioko ontzia bisitatu du, Melgosa sailburuarekin eta jardunaldian parte hartu duten GKEekin batera. Bertan, itsasontziak itsasoan ontzi bat ikusten duenean egiten duen lana ezagutu du, baita pertsonak erreskatatzeko eta ondoren Kanarietara edo beste harrera-eremu batzuetara eramateko prozesua nolakoa den ere.

Pradalesek bere hitzaldian nabarmendu duenez, “Open Armsek gogorarazten digu bizitzak salba ditzakegula giza eskubideak erdigunean jartzen ditugunean. Baina, era berean, gogorarazten digu milaka pertsonak bizitza galtzen dutela itsasoan, Europara iritsi nahian”.

Lehendakariak migrazioaren errealitateari erantzukizunez eta plan integralen bidez aurre egiteko beharra azpimarratu du: “Migrazioa ez da onkeriazko diskurtsoekin konpontzen, ezta sinplifikazio populistekin. Ezin dugu beste aldera begiratu, eta ezin dugu onartu muturreneko jarrerek agenda markatzea. Errealitateari aurrez aurre begiratu, mahukak bildu eta lanean hastea da jokabide arduratsua”.

Ildo horretatik, Pradalesek nabarmendu du Euskadik eta Kanariek aliantza indartu dutela eta Estatuari migrazioa kudeatzeko egiturazko plan bat exijitzen jarraituko dutela.

Azkenik, zuzeneko mezu bat helarazi die lan humanitarioa kritikatzen dutenei: “Open Armsen lana kritikatzen dutenei hona etortzeko eta hemen bizitzen ari den dramari aurpegia eta begiak jartzeko gonbita egiten diet”.