Valverde: «Aste hobeak izan ditugu, baina jarraitu egin behar dugu»

Valverdek orain arte jokatutako partida guztietan izandako berdintasuna azpimarratu du eta hori «denboraldiko joera orokorra» izango dela uste du

Ernesto Valverde Athletic Clubeko entrenatzaileak agerraldia egin du hiru porrot jarraian daramatzaten lehoiek Girona FC taldearen bisita jaso aurretik: «Joan den eguneko ahaleginetik errekuperatzen saiatzen eta biharko prestatzen ari gara txapelketan atsedenik ez dagoelako. Aste hobeak izan ditugu, baina jarraitu egin behar dugu. Aurreko urteetan ere une batzuetan ez gara fin ibili, baina ez nago kezkatuta. Galdu ditugun partidak golik gabe ikusten badituzu, ez duzu uste galdu dituzunik, gehienetan nagusi izan garelako».

Teknikari zuri-gorriaren ustez, orain arte ez da alde nabarmenik izan: «Neurketa guztiak parekatuak izan dira eta xehetasunengatik erabaki dira, batzuetan gure alde eta beste batzuetan kontra. Berdinketarik gabe. Ez dugu erraz irabazi eta ez digute argi garaitu. Beraz, denboraldiko joera orokorra izango dela uste dut».

Azkenik, aurkariari dagokionez, Valverdek ez du uste bere sailkapen-egoera delikatuak eraginik izango duenik: «Girona, posizio zailean dagoela jakinda, norgehiagoka gogorra egitera etorriko da eta gure taldean ikusitako ahulezietatik abantaila ateratzen saiatuko da. Ondo jokatzen du, presiotik irteten bada oso altu irits daiteke, ez dio inoiz uko egiten baloiarekin ausartzeari eta jokoa dominatzen duten jokalari teknikoak ditu. Liga asko geratzen da, hasi besterik ez du egin eta denok kokatzen ari gara. Ez du hasiera ona izan, baina aurrera ateratzeko baliabideak ditu. Asko baloratzen ditugu eta gogoratu behar da duela bi denboraldi LaLiga irabazteko borrokan ibili zela. Aurkari guztiek beti dute beharra eta ona da hala sentitzea. Guk ere agerian utzi behar dugu hori».