Ertzaintzak etxebizitzetan lapurretak egiten espezializatutako talde kriminal bat desegin du

Ertzaintzak, Esquadra Mossoekin koordinatuta, etxebizitzetan lapurretak egiten zituen talde kriminal ibiltari bateko hiru kideak atxilotu zituen joan den astean Donostian. Jatorriz Europa ekialdekoak diren hiru atxilotuei Donostia, Zarautz eta Azpeitiako etxebizitzetan egindako hiru lapurreta leporatu dizkiete, eta Gipuzkoako hiriburuko beste etxebizitza bateko lapurreta ikertzen jarraitzen dute.

Joan den irailaren 26an, Ertzaintzak jakin zuen, Esquadra Mossoekin izandako koordinazioari esker, jatorriz Europa ekialdekoak ziren hiru gizonek osatzen zuten eta batez ere etxebizitzetan indarra erabiliz lapurretak egiten zituen talde bat Euskadira iritsi zela, ustez delituak egiteko asmoz.

Esquadra Mossoek jakinarazi zutenez, talde kriminalak Bilbon hartu zuen ostatu, baina Zarautzera (Gipuzkoa) joan zen.

Ertzaintzak, berehala, ikerketa jarri zuen abian Gipuzkoako Ikerketa Kriminaleko Lurralde Zerbitzuaren (SICTG) ardurapean, eta jakin ahal izan zuen taldeak lapurreta egin zuela Zarauzko etxebizitza batean eta, ondoren, Bilboko ostatura itzuli zela. 

Bizkaiko Ikerketa Kriminaleko Lurralde Zerbitzuarekin eta Esquadra Mossoekin koordinatuta, irailaren 27an, taldeko kideak Azpeitian atzeman zituzten. Bertan beste lapurreta bat egin zuten etxebizitza batean, eta, ondoren, Bilbora itzuli ziren, hurrengo egunean berriro Bartzelonara joateko, eta han hiriburu horretako etxebizitza batean sartzen detektatu zituzten.  

Urriaren 1ean, Esquadra Mossoek jakinarazi zuten talde hori bera berriz ere Bilbora joan zela, eta Ertzaintzak aurreko hotel-establezimendu berean sartzen ikusi zuen.  Egun horretan bertan, taldeko kideak Donostiako Zubieta auzora joan ziren, eta bertan ustez beste etxebizitza batean sartu ziren, eta gero presaka itzuli ziren Bilbora.

Hurrengo egunean, hiru gizonak Gipuzkoako hiriburura itzuli ziren, eta Aiete auzoko etxebizitza batean sartzen detektatu zituzten. Bertatik irten ondoren, agente ikertzaileek atxilotu egin zituzten.

Beren gauzak eta erabili zuten ibilgailua miatu ondoren, dirua, bitxiak, eskularruak, erremintak eta euren delitu-jarduerarekin zerikusia zuten beste hainbat gauza konfiskatu zizkieten.

Urriaren 3an, taldeak Bilbon hartuta zuen ostatuan sartu eta miaketa egin zuten, eta agenteek ikertutako lapurretekin zerikusia zuten objektu gehiago konfiskatu zituzten.

Hiru gizonak, 27 eta 40 urte bitartekoak, epailearen esku jarri zituzten. Bien bitartean, Ertzaintzak ikertzen jarraitzen du Donostiako Zubieta auzoko etxebizitza batean ustez egindako lapurreta argitzeko eta ustez lapurtutakoak ziren eta taldeak Bilbon hartuta zuen ostatuan aurkitu zituzten objektuen jatorria zehazteko.