URA Mape ibaia lehengoratzen hasi da Busturian, Alarbin parean

• Ur-emaria neurtzeko estazio zahar bat eta ur-jauzi artifiziala kendu nahi dira, baita gaur egun harri-lubetaz estalitako 180 m-ko ibaiertzaren naturalizazioa ere

• Inbertsio publikoa 192.635,74 eurokoa da, eta ibaiaren egoera hobetzea du helburu, biodibertsitate handiagoa izan dezan eta herritarrentzat eremu irisgarriagoa eta atseginagoa sortzeko

URAk Mape ibaia lehengoratzen hasi da Busturian, Alarbin parean: ur-emaria neurtzeko estazio zahar bat eta ur-jauzi artifiziala kentzean datza, baita gaur egun harri-lubetaz estalitako 180 m-ko ibaiertza naturalizatzean ere. Dagoen harri-lubeta desegin ondoren, ibaiertzeko ezponda leunduko da Kontserbazio Bereziko Eremu batean dagoen ibai-tarte batean.

Inbertsio publikoa 192.635,74 eurokoa da, eta ibaiaren tartea birnaturalizatzea du helburu (ibaiaren luzetarako eta alboko konektibitatea lehengoratuz), zein ingurunean uholde-arriskua murriztea. Xedea da ibaiak biodibertsitate handiagoa izatea eta, gainera, herritarrentzat eremu irisgarriagoa eta atseginagoa sortzea. Mape ibaiaren ingurua leheneratzeko proiektuak, Alarbindik igarotzean, Euskal Herriko Unibertsitatearen (EHU) ingurumen-aholkularitza du.

Mape ibaia Urdaibaiko Ibai Sarean eta Kontserbazio Bereziko Eremuan (ES2130006) sartuta dago, eta jarduketa horren bidez lehentasunezko ibai-habitata lehengoratzen lagunduko da, hala nola haltzen edo lizarren alubioi-basoak (alegia,ibaiertzetako ekosistemak, oro har, ibaietatik eta errekastoetatik igarotzen direnak, eta garrantzi ekologiko handikoak: biodibertsitateagatik, ur-erregulazioan duten paperagatik eta uraren kalitatea hobetzeko duten gaitasunagatik), baita espezieentzako habitata ere, hala nola baso-igel iberiarra edo bisoi europarra.

Aitor Aretxaga alkateak adierazi duenez, «jarduera honen helburua da gure ingurune naturala babestea, haren erabilera jasangarria bultzatzea eta Busturiako ondare etnografikoa babestea. Mape ibaia Kontserbazio Bereziko Eremua da, eta URArekin sinatu dugun eta Euskal Herriko Unibertsitatearen aholkularitza duen hitzarmenari esker, ibai-habitata eta baso-igela bezalako espezieak lehengoratzen lagunduko dugu, besteak beste. Gainera, erriberako landaredia birsortuko dugu, eta Altamira eta San Kristobal eremuetan uholde-arriskuak saihestuko ditugu, euri-jasa handiak direnean arriskupean baitaude «, adierazi du Aitor Aretxaga alkateak.

Jarduera hori Busturiaren eta URAren arteko erakunde arteko lankidetza estuan kokatzen da. Lankidetza horren bidez, Mape eta Axpe Amunategi ibaietan jarduketak egin izan dira aurretiaz, bai birnaturalizatzeko, bai uholde-arriskua murrizteko.