Euskadiko haur pobrezia tasa Europakoa eta espainiar estatukoa baino txikiagoa da

Melgosa sailburuak adierazi du 2023ko Haur Bermearen Euskal Estrategia lehen mailako gizarte-inbertsioa dela, eta haur eta nerabeek aukerak izateko euskarria dela, prebentzioa, sustapena eta babesa bultzatuz.

EAPNk antolatutako jardunaldian, Nerea Melgosa sailburuak erakunde horrek haurren pobreziari buruz atzo emandako datuak ebaluatu ditu. Pobreziaren aurkako Europako Sarearen (EAPN-ES) azken txostenaren arabera, gaur egun haurren pobrezia-tasa % 29koa da Espainiako estatuan, % 19koa Europan eta % 15ekoa Euskadin. «Ez gara konformatzen Estatuko batez bestekoa eta Europako batez bestekoa baino hobeto egotearekin, haur-pobreziaren tasak behera egiten jarrai dezan lanean jarraitzeko konpromiso sendoa dugu» azaldu du Ongizate, Gazteria eta Erronka Demografikoko sailburuak.

Nerea Melgosak gogorarazi du duela hilabete batzuetatik hona Eusko Jaurlaritzak Haur Bermearen 2030erako Estrategia martxan jarrita duela. Ongizate, Gazteria eta Erronka Demografikoko Sailak garatutako estrategia bat da, adingabeak eskubideen subjektu eta beren bizitzaren protagonista gisa ezartzen dituena; eta, besteak beste, haurren pobrezia-tasa eta helduen pobreziarekiko arrakala murriztea bilatzen du. «Lehen haurtzaroari arreta berezia eskaintzen dion tresna da, funtsezko etapa gisa, bai eta bazterkerian edo kaltebera diren haurrei ere. Gizarte-kohesioari eta aukera-berdintasunari dagokienez oinarrizko erronka da. Haurren pobrezia ez da diru-sarrera kontua bakarrik: hezkuntza, kultura, gizarte eta emozio aukeren gabezia da» azpimarratu du sailburuak gaur Bilboko Euskalduna Jauregian egindako jardunaldian.

2030erako Haur Bermearen Estrategia lau ekintza-ardatzen inguruan egituratzen da, eta horiek 14 jarduera-eremu espezifikotan eragiten dute.

– Lehenengo ardatzak haur-pobrezia murriztearen aldeko apustua egiten du, diru-sarrerak bermatzeko eta familiei laguntzeko prestazioak indartuz.
– Bigarren ardatza haurrak artatzeko, gizarteratzeko eta zaintzeko ekosistema komunitarioen garapenean oinarritzen da, desabantaila-egoeran dauden haurrei arreta berezia eskainiz.
– Hirugarren ardatzak eskubide sozialak benetan eskuratzeko orduan dauden desberdintasunak murriztea du helburu.
– Laugarren ardatza parte-hartzea, sentsibilizazioa, ikerketa, ebaluazioa eta gobernantza dira.

Ardatz horietatik abiatuta, 12 helburuk bermatzen dute 2030erako Haur Bermearen Estrategia. Hauek dira helburu horietako batzuk: Diru-sarrerak Bermatzeko eta Gizarteratzeko Euskal Sistemaren prestazio eta laguntza ekonomikoak eskuratzea, egoera ahulean dauden adingabeei eskolaz kanpoko jardueretarako sarbidea erraztea, aisialdi eta aisia hezitzailea, kultura eta kirola, edo seme-alabak dituzten familientzako etxebizitza-programetan diskriminazio positiboko irizpideak sartzea, egoera bereziki ahulean dauden kasuetan.

«2030ko Haur Bermearen Estrategia lehen mailako gizarte-inbertsioa da, baita haur eta nerabeek aukerak izan ditzaten euskarri bat ere. Prebentzio, sustapen eta babes-funtzio hirukoitza bultzatuz, haur ahulenei zuzendutako ekintza positiboko neurriak hartuko diru eta, horrela, Haur eta Nerabeen Euskal Legearen aurreikuspenak hedatzeari ekingo dio. Euskadiko familia guztiak kontuan hartzen ditugueta ez dugu inor atzean utziko «azaldu du Nerea Melgosak.