Euskal turistei zuzendutako “Bidaia arduratsu baterako gida” kanpaina aurkeztu du Euskadik Fitur 2026n

• Euskadik Bidaia Arduratsu baterako Gida kanpaina aurkeztuko du FITUR 2026n, eta turismo jasangarriarekin, errespetuzkoarekin eta etikoarekin duen konpromisoa indartzen du horrela.
• Eusko Jaurlaritzako Turismo, Merkataritza eta Kontsumoko sailburu Javier Hurtadok, Basquetourreko zuzendari Daniel Solanarekin batera, Euskadik Fitur 2026n izango duen parte-hartzea aurkeztu du, eta urtarrilaren 21etik 25era Madrilen egingo den nazioarteko azoka turistikoaren esparruan ezagutzera emango den “Bidaia arduratsu baterako gida” kanpaina berria azpimarratu du.

Kanpaina berri hau hirugarren ardatza da eta Sailak eta Basquetour Turismoaren Euskal Agentziak bultzatutako sentsibilizazio turistikoaren estrategiaren zirkulua ixten du, Turista Maitea (Euskadi bisitatzen dutenei zuzendua) eta Turismo maitea (tokiko biztanleak ardatz dituena) kanpainen ondoren.

Bidaia arduratsu baterako gidarekin, Eusko Jaurlaritzak euskal herritarrei zuzentzen die orain bere mezua, kanpora bidaiatzen dutenean, koherentzia eta elkarrekikotasuna eskatuz: “Bisitatzen gaituztenei gure kultura, ingurunea eta bizimodua errespetatzeko eskatzen badiegu, modu berean jokatu behar dugu beste helmuga batzuetara bidaiatzen dugunean”, adierazi du sailburuak.

Kanpainak hainbat balio sustatzen ditu, hala nola ingurune naturalarekiko, kulturalarekiko eta sozialarekiko errespetua, tokiko biztanleekiko bizikidetza eta jokabide turistikoaren erantzukizun indibidual eta kolektiboa. “Helburua da euskal bidaiariak turismoan jardunbide egokien enbaxadore bihurtzea, jasangarritasuna balio unibertsala delako ideia indartuta, tokiko eremura mugatu gabe”, adierazi du.

Kanpaina honekin, Euskadik indartu egiten du balio ekonomiko eta soziala sortzen duen turismoarekiko konpromisoa, erantzukizunean, etikan eta bisitarien eta herritarren arteko errespetuan oinarrituta, bere lurraldean zein kanpoan.

Euskadi FITUR 2026n

Fitur 2026n, Euskadiren parte hartzea euskal turismorako funtsezkoa den urte batean kokatzen da, erregulazioan, jasangarritasunean eta koordinazio instituzionalean egindako aurrerapenak markatutakoan. 2025ean stand instituzional onena izendatu ondoren, diseinua errepikatu eta Euskadiko standa txalaparta handi batean inspiratu da berriro, Euskadi plural, ireki eta abegikor baten ikur.

Hiru egun profesionaletan, erakustokiak agenda bizia hartuko du, aurkezpen instituzionalekin, topaketa sektorialekin eta bilera profesionalekin, eta asteburuan zehar publikoari irekitako jarduerekin luzatuko da. Aldundiek, udalek, eskualdeek eta garapen-agentziek hainbat proiektu aurkeztuko dituzte, gai hauekin lotuta: jasangarritasuna, irisgarritasuna, digitalizazioa, turismo aktiboa, zikloturismoa, gastronomia eta kultura.

Gainera, Euskadiren guneak bilera-eremu zabala izango du turismo-sektorearentzat, eta aurkezpen estrategikoen agertoki izango da, hala nola 2026rako Basquetourren ekintza-plana, helmuga turistiko adimendunen ekimenak, lankidetza-akordioak eta nazioarteko sustapen-ekintzak.

Asteburuan zehar, standak kulturako eta gastronomiako programazioa eskainiko du, dastatze, tailer, euskal dantza erakustaldi, elkartasun-ekintza eta familiei zuzendutako proposamenekin. Euskadik bere irudia indartuko du horrela, helmuga jasangarri, askotariko eta nortasun propiodun gisa.