Euskadik Fitur itxi du profesionalen eta publikoaren presentzia aktiboarekin

• Pintxo Pote Solidarioak 4.800 euro bildu ditu standa publikoari irekitako bi egunetan eta Mugarik Gabeko Medikuak gobernuz kanpoko erakundeari emango zaio, Gazako laguntza humanitariorako.

Euskadi berriro nabarmendu da Fitur 2026 Nazioarteko Turismo Azokan. Jarduera zabala izan du lan-eremuan egin dituen topaketa profesionaletan, eta publikoaren asistentzia nabarmena izan du asteburuan.

Negozio-bilerak

170 enpresa baino gehiago bertaratu dira Euskadiko standera, aurreko edizioaren antzera, baina bilerak pixka bat jaitsi dira hainbat arrazoirengatik, besteak beste, izan diren tren-istripuengatik erabakitako dolu ofiziala eta denboralearen ondorioz hegaldiak eta bidaiak bertan behera utzi behar izan direlako. Horregatik, dagoeneko antolatutako bilera batzuk bertan behera utzi behar izan ziren azken unean. Dena den, balantzea positiboa da, 700 bilera inguru egin baitira.

Esperientzia gastronomikoa – Euskadi Gastronomika

Aurten, lehen aldiz, Euskadiko standak esperientzia gastronomiko sentsorial bat hartu du, eta harrera bikaina izan du publikoaren aldetik. Gainera, 100 profesional inguruk aukera izan dute murgiltze-proposamen berritzaile honetaz gozatzeko, soinuzko ibilbide bat eskainita Euskadin zehar, ardo- eta pintxo-dastaketa sorpresa batekin batera.

Erakusmahaietan emandako arreta

Euskadiko erakusmahai tematikoek ia 6.000 pertsonari eman diete arreta azoka-egunetan. Gure produktu turistikoei buruz gehien eskatzen den informazioa dela eta, aipatzekoak dira ibilbideak autoan eta motoan, asteburuko planak, kulturalak edo familian, eta gastronomiari dagokionez, pintxoen ibilbidea, esperientzia gastronomikoak eta, berritasun gisa, sagardotegiei buruzko kontsultak. Bestetik, azpimarratzekoak dira produktu ekoturistikoa (mendi-ibiliak eta natura, ingurune naturaleko jarduerak, autokarabanako ibilbideen aukerak) eta abuztuko eguzki-eklipseari buruzko kontsultak. Azkenik, Euskadin filmatutako pelikulen eta telesailen kokalekuekin lotutako informazio-eskaera nabarmendu behar da.

Standeko informatzaileek eta arduradunek adierazi dutenez, interes handiagoa ikusi dute bisitarien aldetik, helmugari buruzko informazio oso zehatzaren bila hurbildu baitira, bidaia hobeto planifikatu ahal izateko.

Asteburuko jarduerek, bisitariak aktiboki inplikatzeko diseinatutakoek, erantzun positiboa izan dute. Jarduera nabarmenen artean dago tabernako Pintxo Pote Solidarioa, 1.600 pertsona baino gehiago erakarri dituena, eta 4.800 euro bildu ere Mugarik Gabeko Medikuak GKEarentzat, Gazako proiektuei laguntzeko. Ekimen solidario honek, danborradarekin, Gasteizko Magialdiaren erakustaldiarekin, euskal dantza garaikidearekin eta hiru lurraldeetako pintxo-tailerrekin batera, bisitarien esperientzia aberastu eta Euskadiren proiekzio positiboan lagundu du.