Euskadiko kulturak bere hazkunde iraunkorra sendotu du, eta bizitasun sozialaren eta ongizate kolektiboaren adierazle nagusietako bat dela berretsi du

Eusko Jaurlaritzako lehenengo lehendakariorde eta Kultura eta Hizkuntza Politikako sailburu Ibone Bengoetxeak EAEko 2025eko Kultura Programazioaren Txostenaren berri eman du Gobernu Kontseiluaren osteko prentsaurrekoan. Txosten horren arabera, jarduera kulturalak gora egin du, euskarak presentzia handiagoa du eta irisgarritasunean eta hurbiltasunean oinarritutako eredua dago.

2025ean, 22.425 kultura-jarduera programatu dira Araban, Bizkaian eta Gipuzkoan, hau da, % 8,5eko igoera 2024arekin alderatuta. Egunerokoan, Euskadik batez beste egunean 61 jarduera kultural izan ditu, lurralde osoan banatuta. Era berean, 2025ean, programazio kulturalaren ia % 40 euskaraz garatu da, sorkuntzako eta eszenako lengoaia gisa duen zeregina indartuta. Aldi berean, zuzeneko arte-jardueren % 40 baino gehiago doakoak dira, eta hainbat publikok kulturarako sarbidea izatea bermatzen da.

Ibone Bengoetxea lehendakariordeak adierazi duenez, “kultura aktibo eta hurbil batek, jarduera ekonomikoa eta enplegua sortzeaz gain, kohesio soziala, identitate partekatua eta bizi-kalitatea indartzen ditu, eta kulturaren ikuspegitik Euskadi ongizatea oinarri duen herrialde bizi eta dinamiko gisa sendotzen du”.

65 milioi etxebizitzarako prestazio ekonomikorako

Gobernu Kontseiluak 65 milioi euroko gastua onartu du gaur, 2026an etxebizitzarako prestazio ekonomikoa (EPE) finantzatzeko, kreditu zabalgarriarekin, laguntza ekonomiko horren estaldura bermatzeko, etxebizitza bat eskuratzeko eskubide subjektiboa ezin denean berehala bete parke publikoko etxebizitza bat edo zuzkidura-bizitoki bat esleituz.

Prestazioa besterenezina da, errenta ordaintzeko baino ez da erabili behar, eta zenbatekoa bizikidetza-unitatearen egoeraren eta alokairuaren kostuaren arabera kalkulatzen da, egiaztatutako errentaren zenbatekoa gainditu gabe. EPEa eskuratzeko, eskubide subjektiboaren baldintzak bete behar dira, eta, besteak beste, alokairuko etxebizitza batean edo aurreikusitako antzeko egoeretan bizi dela egiaztatu behar da, bai eta ezarritako baldintza ekonomikoak ere.

Gastuaren onarpen horrekin, «Eusko Jaurlaritzak konpromisoa indartzen du etxebizitza eskuragarri gehiago konbinatzen dituen eredu batekin, eta, eskaintza hori handitzen den bitartean, berme-mekanismoak ezartzen ditu etxebizitza duin eta egonkor baterako eskubide subjektiboa bete dadin, laguntza ekonomikoaren bidez, beharrezkoa denean», adierazi du Denis Itxaso Etxebizitza eta Hiri Agendako sailburuak.

9,5 milioi Bakioko Urkitza Zentroa handitzeko

Eusko Jaurlaritzak Gobernu Kontseiluan onartu du ia 9,5 milioi euro inbertitzea Bakioko (Bizkaia) Urkitza Zentroa handitzeko obretan, udalerriko hezkuntza-espazioak eta -instalazioak hobetzeko eta ikasleei espazio, erosotasun eta zuzkidura hobeak dituen ikastetxe bat eskaintzeko, eskola publikoa indartuz kalitatezko hezkuntzarako sarbide unibertsalaren berme gisa.

Eusko Jaurlaritzako bozeramaile Maria Ubarretxenak adierazi duenez, «jarduera Bakioko biztanleriak azken urteetan izan duen hazkundeari dagokio, eta, horren ondorioz, beharrezkoa izan da zentroa handitzea Haur eta Lehen Hezkuntzako bi lerroko eredu oso bat eskaintzeko, hau da, ikasturte bakoitzeko bi talde: 8 Haur Hezkuntzan eta 12 Lehen Hezkuntzan, familien beharrei erantzunez».

Seme-alabak dituzten familientzako laguntzak

Gaur, halaber, Gobernu Kontseiluan onartu da 30/2015 Dekretuak eta 27/2023 Dekretuak araututako seme-alabak dituzten familientzako laguntzak finantzatzeko 2026ko ekitaldirako behar den gastua, ia 200 milioi eurokoa.

58,5 milioi euro urte honi dagozkio. 53,5 milioi 2027an; 37,5 milioi 2028an; 34,8 milioi 2029an; eta 15,4 milioi euro 2030ean.

Gorroto-delituetan sakontzeko EHUrekin sinatutako hitzarmenaren berritzea

Azkenik, argi berdea eman zaio Euskal Herriko Unibertsitatearekin (EHU) sinatutako lankidetza-hitzarmena berritzeari, Euskadiko gorroto-delituei buruzko txosten bat egiteko eta Europarekin alderatzeko.

Hitzarmena Segurtasun Sailak eta EHUk sinatu dute, Giza Eskubideen eta Botere Publikoen UNESCO Katedraren bidez, eta haren helburua azterlan bat egitea da, kriminalitate-mota hori epe ertain eta luzean hobeto ezagutu, prebenitu eta ahalik eta modu eraginkorrenean desagerrarazteko tresna izaten jarraitzeko.

Prentsa-txostena

Gai-zerrenda