26_0079 Bi atxilotu Bilbon indarkeria erabiliz lapurreta egiteagatik

Ertzaintzako agenteek gizon bat eta emakume bat atxilotu dituzte Bilbo Zaharra auzoan oinezko bati lapurreta egiteagatik.

Atzo, asteartea, arratsaldeko hiruak baino lehentxeago, partikular batek polizia agertzea eskatu zuen Bizkaiko hiriburuko Gorte kalean, lapurreta egin baitzioten. Artatu zuten ertzainei azaldu zienez, emakume ezezagun bat hurbildu eta hizketan hasi zitzaion, eta harekin hizketan ari zen bitartean, gizon bat gerturatu zen atzetik eta objektu zorrotz bat jarri zion bizkarrean. Jarraian, gizonak diru-zorroa kendu zion eta bertan zeukan dirua atera eta itzuli egin zion, eta, ondoren, alde egin zuen. Handik pixka batera, biktimak inguruko plaza batean elkarrekin ikusi zituen emakumea eta lapurreta egin zion gizona. 

Patruilak bi sumagarrien bila hasi ziren, eta inguruan aurkitu eta atxilotu zituzten. Gizonari, espainiar nazionalitateko 50 urtekoari, ustez lapurreta egiteko erabili zituen guraizeak atzeman zizkioten. Bigarren inplikatua espainiar nazionalitateko 27 urteko emakume bat zen.

Atxilotuek polizia-aurrekari ugari dituzte, gehienak ondarearen aurkako delituengatik, eta atzo arratsaldean jarri zituzten epailearen eskuetan. 

Merkataritza-establezimendu batean lapurreta egiteagatik atxilotu dute

Atzo, asteartea, gaueko bederatziak aldera, Ertzaintzako agenteak Bilboko merkataritza-establezimendu batera joan ziren, bertako segurtasun-langileek hainbat gauza lapurtu zituen pertsona bat baitzuten atxikita. 

Bertaratu ziren agenteei azaldu zietenez, gazteak 600 eurotik gorako balioa zuten produktuak sartu zituen poltsa batean, eta, harrapatu zutenean, segurtasun-taldeko kide bat jo zuen, eta mendean hartu eta atxiki egin zuten, beraz. Horren aurrean, gizona atxilotu zuten indarkeriaz lapurreta egitea leporatuta. 

Atxilotua, espainiar nazionalitateko 29 urteko gizona, gaur goizean jarri dute epailearen eskuetan.