Ertzaintzak Andoaingo ostalaritza-lokal baten arduraduna atxilotu zuen atzo, asteazkena, lokal barruan substantzia sorgorgarriak atzeman ondoren. Bezperan, establezimendutik haxix-tableta batekin irten zen beste gizon bat atxilotu zuten.
Hernaniko Ertzain-etxeko herritarren babeserako bi patruilek droga-trafikoaren aurkako prebentzio-kontrol bat egin zuten atzo, asteazkena, 20:30 aldera, Andoaingo hirigunean, bezperan gizon bat atxilotu baitzuten 100 gramotik gorako haxix-tableta batekin herriko taberna batetik irten zenean.
Agenteak ostalaritza-lokal horretara sartu ziren eta bezero bat eta establezimenduaren arduraduna aurkitu zituzten bertan, eta azken horri kontrolaren arrazoia eta legezko bermeak azaldu zizkioten.
Baliabideek tabernako gelak miatu zituzten, eta pote batean ezkutatuta hauts zuri bat, ustez kokaina edo speeda, 20 gramo, substantzia bera zuten 1 gramoko bost poltsa eta 78 gramoko haxix-plaka bat eta doitasun-baskula bat aurkitu zituzten. Gainera, aipatutako poltsak ixteko materiala, aire konprimatuko pistola bat eta telefono mugikor bat ere aurkitu zituzten. Lokaleko arduradunak adierazi zuen ez zekiela azken horren jabeari buruzko daturik.
Hori guztia dela eta, ebidentzia guztiak konfiskatu eta arduraduna atxilotu zuten droga-trafikoaren delitua leporatuta.
Atxilotuak, magrebtar jatorriko 59 urteko gizonak, aurrekariak ditu horrelako egitateengatik, eta polizia-egoitzara eraman zuten zegozkion eginbideak hasteko.