Donostiak 3,7 milioi euro bideratu ditu Gizarte Larrialdietarako Laguntzetara 2026rako

Tokiko Gobernu Batzarrak 2026rako Gizarte Larrialdietarako Laguntzei (GLL) dagozkien jarduera-irizpideak eta 3.728.741 euroko hasierako aurrekontua onartu ditu. Laguntza horiek funtsezko tresna dira egoera ekonomiko ahulean dauden udalerriko pertsonei eta familiei arreta bermatzeko.

Jon Insausti alkateak nabarmendu duenez, «udal-gobernuak gizarte-babesaren arloan hartzen dituen neurri guztiek helburu argi bati erantzuten diote: donostiarren bizi-kalitatea hobetzea eta pertsona bakoitzak, bere egoera edozein dela ere, aurrera egiteko babesa izango duela ziurtatzea«.

Laguntza horiekin, donostiar ahulenei zuzendutako beste laguntza askorekin batera, Udalak gizarte-babesarekiko konpromisoa berresten jarraitzen du, premiazko beharrei arintasunez erantzutea ahalbidetzen duten neurriak bultzatuz, hala nola etxebizitza eskuratzea eta mantentzea, oinarrizko gastuak estaltzea edo zorpetzea prebenitzea, oinarrizko premia horiek bete ezin izateagatik.

Donostiako familien egonkortasunerako funtsezko tresna

Laguntza horietarako hasierako aurrekontua 2026an 3.728.741 eurokoa izango da, eta ekitaldian zehar handitu ahal izango da, gizarte-eskariaren eta aurrekontu-erabilgarritasunaren arabera. Aurreikuspen malgu hori udalak herritarren benetako beharretara egokitzeko eta inor atzean geratzen ez dela ziurtatzeko borondatea duenaren adierazle da. Izan ere, Udalak eskatutako laguntzen % 100 ematen du.

2025. urtean, 2.799 bizikidetza-unitatek jaso zituzten laguntza horiek, eta guztira 3.639.562 euro bideratu ziren horietara. 2026ko lehen aste hauetan, Udalak 631 eskaera jaso ditu.

Irizpideak eguneratu dira, ekitate eta eraginkortasun handiagoa lortzeko

Onartutako dokumentuak zenbait aldaketa dakartza 2026rako, kudeaketa hobetzeko eta laguntzak egungo errealitate sozioekonomikora egokitzeko. Aldaketa nagusien artean, hauek nabarmentzen dira:

• Ekitaldirako aurreikusitako araudi autonomiko berrira egokitzea.
• Diru-sarrerak eta aldaketa ekonomikoak zenbatzeko irizpide berriak.
• Alokairuen jabetzarekin edo diru-sarrerekin lotutako kasuak argitzea.
• Mugak kentzea gizarte-balioespena duten obretarako laguntza jakin batzuetan.
• Energiari, etxebizitzetan sartzeari edo komunitate-gastuei lotutako laguntzak emateko hobekuntzak.
• Laguntzak eten daitezkeen egoerak zabaltzea eta zehaztea, 14/2022 Legearen esparruari jarraiki.

Egokitzapen horien bidez, kudeaketa bidezkoagoa, arinagoa eta eskatzaileek aurre egiten dieten egoera-aniztasunera egokitua bermatu nahi da, eta Udalaren konpromisoaren erakusgarri da laguntza-sistema sendo, gizatiar eta eraginkor batekiko konpromisoa, pertsona guztiek beren oinarrizko beharrak bete eta bizi-proiektu duin bati eutsi ahal izatea ziurtatzera bideratua.