“Mundakako Atorrak” argitalpenak udalerriko ondare immateriala osatzen duten abestiak eta historia jasotzen ditu

«Mundakako Atorrak» argitalpena aurkeztu da Mundakan. Liburuak pertsonaia horien historia eta abestiak berrikusten ditu, izan ere, inauterietako igandero Mundaka kostako herriko kaleak musikaz, umorez eta tradizioz betetzen dituzte. Argitalpen honek eta 12 abestiko diskoak Mundakako Udalaren eta Bizkaiko Foru Aldundiko Euskara, Kultura eta Kirol Sailaren babesa jaso dute.

Leixuri Arrizabalaga Euskara, Kultura eta Kiroleko foru diputatuak, Sorne Rubio Mundakako alkateak eta Gaizka Lozano Mundakako Elkarteko presidenteak parte hartu dute ekitaldian, Atorrak elkarteko eta udalerriko kultura- eta politika-arloko ordezkariekin batera.

Argitalpena lan kolektiboaren emaitza da, eta Mundakako tradizio maitatuenetako baten esentzia islatzen duten testigantzak, argazkiak eta abestiak biltzen ditu. «Eskerrak eman nahi dizkiegu beren oroitzapen eta ekarpenekin liburu hau posible egin duten pertsona guztiei», nabarmendu du erakundeak. «Zuen lankidetza funtsezkoa izan da gure herriaren kultura-ondarearen zati hori kontserbatzeko eta zabaltzeko».

Atorrak — Mundakako inauteriaren sinboloa — Bizkaiaz haraindiko erreferentzia dira, eta urtero erakartzen dituzte Euskal Herri osoko bisitariak, ez baitituzte beren desfilea eta abestiak galdu nahi. Gaizka Lozanok gogorarazi duenez, «gure herriko Aratusteak paregabeak dira: urtero, aurreko urtean bizitakoa kontatzen duen abestia sortzen dugu. Gure historia musikarekin erregistratzeko modua da, memoria kolektiboa bizirik mantentzeko modua».

Mundakako Atorrak liburuak historia hori jasotzen du, hain zuzen ere: Atorren eta Mundakaren bilakaera, hamarkadetan zehar, udalerriko gizarte- eta hiri-aldaketak islatzen dituzten letren eta anekdoten bidez. «Atorren eta gure herriaren bilakaera eskutik doaz beti», azpimarratu du Lozanok.

Argitalpenaren lehen edizioa Udalak eta Bizkaiko Foru Aldundiak bultzatu dute, jendeari arrazoizko prezioan eskaintzeko eta herritarren artean errazago zabaltzeko.