26_0124 Bikote bat atxilotu dute Gasteizen substantzia sorgorgarriak edukitzeagatik

Ertzaintzak 34 urteko gizon bat eta 35 urteko emakume bat atxilotu ditu Arabako hiriburuko udal-barrutian, droga-trafikoaren ustezko delitu batengatik. Biak furgoneta batean atzeman zituzten N-104 errepidean, eta furgoneta barruan substantzia sorgorgarriak eta doitasun-balantza bat aurkitu zituzten.

Atzo, asteazkena, arratsaldeko zazpi eta erdiak aldera, herritarrak babesteko lanetan ari zen eta Gasteiz kanpoaldean N-104 errepidean zihoan patruila batek furgoneta bat ikusi zuen bazterbidean geldituta eta larrialdi-seinaleak eta seinaleztapen-baliza aktibatu gabe.

Patruila ibilgailuaren atzean jarri zen, eta bat-batean abiatu egin zen. Pixka bat aurrerago, eta zirkulaziorako eremu seguru batean, polizia-dotazioak geldiarazi egin zuen, eta bidaiariak, biak europar jatorrikoak, identifikatu zituen.

Gizonak, gidariak, ez zuen zegokion baimena, eta ibilgailuaren dokumentazioari dagokionez, furgonetaren alokairu-kontratua bakarrik zeraman, beste pertsona baten izenean zegoena eta epea orain dela egun batzuk amaituta zuena. Gainera, dagozkion alkohol- eta droga-kontrolak egin zizkioten eta positibo eman zuen droga-testean.

Bietako batek ere ez zuen azalpen koherenterik eman aipatutako errepidean egoteari eta gelditzeari buruz. Ibilgailua miatu zutenean, maletatxo bat aurkitu zuten aurreko eserlekuen atzean, arropa batzuekin estalita. Barruan dozena bat bilgarri zeuden, kolore zuri ilunduko hauts-substantzia batekin, eta poltsatxo bat beste substantzia batekin, hori guztia, ustez, substantzia sorgorgarria, bai eta doitasun-baskula bat, esteroide anabolizatzaileen hiru pote eta gako-joko bat ere.

Aurkitutako substantziak kontuan hartuta, 34 urteko gizona eta 35 urteko emakumea droga-trafikoagatik atxilotu zituzten, eta polizia-egoitzara eraman zituzten beharrezko izapideak egiteko.

Biak laster agertu beharko dute epailearen aurrera.