Eusko Jaurlaritzak mugaz gaindiko lankidetza zientifikoa indartu du “LTC Sarea Encounter 2026” topaketan

• LTC Sarea sareak hamarkada bat baino gehiago darama Euskadi eta Akitania Berriaren arteko lankidetza estrategikoa sustatzen.

• Ekitaldian Mugaz Gaindiko Lankidetza Laborategi (LTC) berri bat iragarri da, Euskal Herriko Unibertsitateak eta Bordeleko Unibertsitateak bultzatuta.

Eusko Jaurlaritzako Zientzia, Unibertsitate eta Berrikuntza Saileko Politika Zientifikoko zuzendari Amaia Esquisabelek “LTC Sarea Encounter 2026” inauguratu du gaur goizean; foro horrek Euskadiko eta Akitania Berriko Mugaz Gaindiko Lankidetza Laborategietako (LTC) eta LTC Incubators laborategietako ikertzaile senior eta juniorrak bildu ditu.

Biarritzen egin den ekitaldian LTC berri baten sorrera iragarri da: Converther. Euskampus Fundazioak, Euskal Herriko Unibertsitateak (EHU) eta Bordeleko Unibertsitateak sustatu dute elkarrekin. Laborategiak prozesu fisiologiko eta patologiko ugaritan esku hartzen duen entzima familia baten azterketan jarriko du arreta (zehazki, proteinen heltzean parte hartzen duten proproteinen konbertasen bidez), eta zahartzearen eta minbiziaren aurkako terapietarako izan dezakeen aplikazioan. Horrela, bi eskualdeentzat estrategikoak diren arloetan partekatutako gaitasun zientifikoak indartuko dira.

Esquisabel zuzendariak azpimarratu du “mugaz gaindiko lankidetza palanka estrategikoa dela gure garaiko erronka zientifiko eta sozial handiei aurre egiteko —klima-aldaketatik hasi eta trantsizio digital eta energetikoraino— ikuspegi partekatu eta anbizio berritu batekin”. Era berean, nabarmendu du ikerketa-agenda bateratuak sendotzeak aukera ematen duela “gaitasunak batzeko, bikaintasuna sortzeko eta Euskadi Europako eta nazioarteko ezagutza-sareetan kokatzeko”.

Lankidetza zientifikoari buruz hausnarketa egiteko gunea

Topaketak gogoeta estrategikoa irekitzeko balio izan du, hamar urte baino gehiagoko elkarlanaren ondoren mugaz gaindiko lankidetza zientifikoaren etorkizunari buruz. Mahai-inguruetan LTCen eginkizuna aztertu da, ikerketaren, prestakuntza aurreratuaren eta talentua erakartzearen motor gisa, baita berrikuntza-ekosistema baterantz izan dezaketen bilakaera ere, enpresa-ehunarekin eta politika publikoekin konektatuta.

“LTC Sarea Encounter 2026” topaketak, horrela, lankidetza-eredu bat sendotzen du, bikaintasun zientifikoan, prestakuntzan, ezagutzaren transferentzian eta inpaktu sozioekonomikoan oinarritua, Eusko Jaurlaritzaren estrategiarekin bat etorriz, nazioarteko esparruan euskal zientzia, teknologia eta berrikuntza sistema indartzeko.