Xabier Legarreta Eusko Jaurlaritzako Gazteria eta Erronka Demografikoko sailburuordea elkarrizketatu dute Hamaika TBn, eta Eusko Jaurlaritzak duela egun gutxi onartu zuen Familia, Haur eta Nerabeen V. Planari buruz hitz egin du. Legarretak azpimarratu nahi izan du azken plan horrek hainbat motatako familiak hartu dituela kontuan, egitura tradizionaletik haratago, besteak beste, guraso bakarrekoak. «Gaur egungoak nolako familiak diren» aztertu ondoren, «euskal familiak gero eta askotarikoagoak» direla ondorioztatu dute, eta Eusko Jaurlaritzaren helburua «familia horiek guztiak kontuan izatea eta laguntzea» izan behar dela. Planak besteak beste berdintasunaren kontzeptua batzen duela azpimarratu Legarretak gaineratuz guraso bien arteko zaintza lana orekatua izan behar dela. «Zaintza ez da bakarrik emakumeen ardura bat baizik eta gizon guztiona ere. Erantzukidetasuna neurtu behar da eta neurketa hori planak aurreikusten dituen 17 neurri traktoreetan jasotzen da» azaldu du sailburuorde bizkaitarrak.
Sare sozialak
16 urtetik beherako nerabeei sare sozialen erabilera debekatzeko espainiar estatuko gobernuak iragarritako neurriaz galdetuta Xabier Legarretak gogoeta plazaratu du. «Debekuaren proposamenetik harago uste dugu gai hau jorratzeko unean erantzunak integrala izan behar duela. Ongizate emozionalaren, pantailen eta sare sozialen erabileraren gaiak ez dira neurri bakar batekin konponduko. Prebentzioan aurrera pausoak eman behar dira eta Eusko Jaurlaritzako hainbat sailetatik aspaldik gabiltza lan hau jorratzen» azpimarratu du Legarretak
2026rako erronkak
Gazteria eta Erronka Demografikoaren sailburuordetzan aurtengo erronka nagusia Familien V. Planaren garapena dela adierazi du sailburuordeak. Era berean Inmigrazioaren VI. planaren ebaluazioa eginda dagoela esanda aurten VII. plana onartuko dela adierazi du Legarretak.
Elkarrizketa osoa: https://www.hamaika.eus/elkarrizketak/xabier-legarreta-eusko-jaurlaritza-hainbat-motatako-familiak.html