Guadalupeko komun publikoetan agertutako pintaketa xenofobo, arrazista eta faxistak gaitzetsi ditu Hondarribiko Udalak

Hondarribiko Udalak irmoki gaitzesten ditu asteburuan Guadalupeko komun publikoetan  agertu diren pintaketa xenofobo, arrazista eta faxistak. Halako mezuak onartezinak dira, eta gure herriak defendatzen dituen errespetuaren, berdintasunaren eta bizikidetzaren aurkako eraso zuzena dira.

Mezu horiek idazten dituztenek erabateko itxikeria agerian uzten dute, eta aldi berean gizakiok bizitza hobe baten bila mugitzeko dugun oinarrizko eskubidea ahazten dute. Izan ere, gaur egun munduko hainbat lekutatik datozen pertsonek egiten duten bezala,  milaka euskaldunek ere bere garaian geure herria utzi behar izan zuten, etorkizun duin baten bila.

Hondarribia herri irekia, anitza eta errespetuzkoa da, eta Udalak argi adierazi nahi du ez duela onartzen inor jatorriagatik, arrazagatik edo bestelako arrazoiengatik iraintzen edo baztertzen duen jokabiderik.

Horregatik, Udalak pintaketak berehala kentzeko neurriak hartu ditu. Era berean, herritarrei dei egiten die errespetuan, aniztasunean eta bizikidetzan oinarritutako herria eraikitzen jarraitzeko, eta gorrotoa edo diskriminazioa agertzen diren tokietan argi eta garbi salatzeko.