Eusko Jaurlaritzak Picassoren «Guernica» aldi baterako Euskadira ekartzea eskatu dio espainiar Gobernuari

• Pradales lehendakariak jada adierazitako eskaera hau lehen Eusko Jaurlaritzaren eta Gernikako bonbardaketaren 90. urteurrenen markoan kokatzen da.
• Bengoetxea lehendakariordeak adierazi du “euskal Herriarentzat duintasun eta erreparazio keinua” izango litzatekeela hau.

Eusko Jaurlaritzak Pablo Picassoren “Guernica” artelana Euskadira aldi baterako lekualdatzea eskatu dio Espainiako Gobernuari, lehen Eusko Jaurlaritzaren osaketaren eta Gernikako bonbardaketaren 90. Urteurrenen markoan.

Lehen lehendakariordeak eta Kultura eta Hizkuntza Politika sailburuak, Ibone Bengoetxeak, eskaera hau berretsi dio Kulturako ministroari, Madrilen ospatutako batzar batean. Bertan azpimarratu du keinu honek “euskal Herriarentzat esanahi historiko, sinboliko eta emozional sakona” izango lukeela, baita “duintasun eta erreparazio” keinua izango litzatekeela ere.

Eskaera hau jada Imanol Pradales lehendakariak egindakoa da Espainiako Gobernuko presidenteari. Hala, artelana Bilboko Guggenheim Museora aldi baterako lekualdatzea planteatu da, bederatzi hilabetez, zehazki, 2026ko urriaren 1etik 2027ko ekainaren 30era bitartean. Eusko Jaurlaritzaren ustez, keinu horrek balio sinboliko handia izango luke, lehen Eusko Jaurlaritzaren sorreraren eta Gernikako bonbardaketaren 90. urteurrenaren testuinguruan.

Testuinguru horretan, Bengoetxea lehendakariordeak azpimarratu du «Gernika» lekualdatzeak “memoria historikoa indartzen eta, orainetik, demokraziaren, askatasunaren eta bizikidetzaren aldeko mezu argia zabaltzen lagunduko lukeela”.

Batzarrean landutako beste gaiak

Lehendakariordeak azpimarratu du bilera «eraikitzailea» izan dela eta Euskadiren eta Espainiako Gobernuaren arteko aldebiko harremana sendotzea ahalbidetu duela, eskumenak errespetatuz eta erakundeen arteko koordinazioa hobetzeko borondatearekin.

Testuinguru horretan, Eusko Jaurlaritzak lehentasunezko hainbat gai helarazi dizkio ministroari: arteari aplikatutako BEZa berrikusteko beharra, Europarekin lerrokatzeko eta sektorea indartzeko; Artistaren Estatutuaren aurrerapena, eremu horretan Euskadik dagoeneko hobekuntza fiskalak bultzatu baititu foru-aldundiekin batera; eta Sestaoko Labe Garaia industria-ondarearen erreferente gisa sendotzea, finantzaketa partekatuko konpromiso baten bidez. Halaber, Estatuaren eta autonomia-erkidegoen arteko kultura-politiken eta kudeaketa-mekanismoen koordinazioa hobetzearen garrantzia azpimarratu da.