Ertzainek gizon bat atxilotu zuten atzo, beste objektu batzuen artean, dozena bat telefono mugikor lapurtzeagatik Santurtziko futbol-zelai bateko aldageletan. Ustezko lapurrak, jokalariak entrenatzen ari zirela aprobetxatuz, instalazioetan sartu eta telefonoak hartu zituen. Udaltzaingoaren patruila batek aurkitu zuen susmagarria metro-geltoki batera sartzera zihoanean.
Lapurreta atzo arratsaldeko zortziak eta hogeian gertatu zen Santurtziko San Juan auzoko futbol-zelaiko aldageletan. Heldu batek eta adingabe batzuek Ertzaintzaren patruila bati jakinarazi ziotenez, pertsona bat zelaiko instalazioetan sartu zen eta aldageletatik dozena bat telefono mugikor eta, besteak bete, motxila bat lapurtu zituen.
Lekuko batek ustezko lapurraren deskribapena eman zuen, eta, bertatik alde egin zuenez, susmagarria bilatzeko dispositibo bat jarri zuten abian. Handik laster, Santurtziko Udaltzaingoaren patruila batek Mamarigako metro-geltokian aurkitu zuen ustezko lapurra. Udaltzainek susmagarria identifikatu eta Ertzaintzari deitu zioten, eta bertaratu ziren agenteek ebasketa-delitu bat leporatuta atxilotu zuten, motxila batean hamabi telefono mugikor, hiru garraio-txartel, bi diru-zorro eta entzungailu batzuk baitzeramatzan, guztiak lapurtutakoak.
Atxilotua polizia-aurrekariak dituen magrebtar jatorriko 30 urteko gizona da, eta Ertzaintzaren egoitzara eraman zuten dagozkion polizia-eginbideak egitera. Horiek amaitu ondoren, epailearen eskuetan jarri zuten.