26_0275 Ertzaintzak bi gizon atxilotu ditu Tolosan, pertsonen legez kanpoko trafikoagatik

Ertzaintzako agenteek gizonezko bat atxilotu zuten atzo, larunbata, goizaldean Tolosan (Gipuzkoa), pertsonen legez kanpoko trafikoko eta ezkutuko immigrazioko delitu bat egotzita. Akusatuak monobolumen bat zeraman, eta bost pertsona gehiago zihoazen. Horietako bat ibilgailuaren maletategian zihoan eta beranduago delitu beragatik atxilotu zuten.

Gertakariak atzo, larunbata, goizaldeko hiru eta erdiak aldera izan ziren, Tolosan (Gipuzkoa).

Ordu horretan, uniformedun patruilan herritarren babes- eta segurtasun-lanak egiten ari ziren Oriako ertzain-etxeko zenbait patruilari, Ertzaintzaren uniformerik gabeko agente deitu zien ibilgailu bat modu okerrean zirkulatzen ari zela esateko.

Uniformedun patruilek ibilgailua Tolosako Ollarain auzoan lokalizatu zuten, eta gelditzeko agindua eman zioten, beharrezko egiaztapenak egiteko. Agenteek egiaztatu zutenez, monobolumenaren barruan bost pertsona gehiago zihoazen, horietako bat maletategiaren barruan. Hori dela eta, agenteek Oriako ertzain-etxera (Tolosa) eraman zituzten sei pertsonak, beharrezko izapideak egiteko eta behar bezala identifikatzeko.

Ertzaintzak jakin zuenez, bost bidaiari magrebtarrak Irunera eta Parisera zihoazen modu irregularrean, aurrez diru-kopuru bat ordaindu ondoren.

Ertzaintza Polizia Nazionalaren Atzerritartasun Atalarekin harremanetan jarri zen, pertsona guztiak modu frogagarrian identifikatzeko.

Horren aurrean, 28 urteko magrebtar gidaria, eta maletategian zihoan 27 urteko magrebtarra atxilotu zituzten pertsonen legez kanpoko trafikoa eta ezkutuko immigrazioa egotzita.

Akusatuak poliziaren zaintzapean geratu dira Ertzaintzaren egoitzan, Tolosan epailearen esku utzi arte, dagozkion eginbideak amaitu ondoren.