26_0323 Hainbat banku-erakundetako bezeroei telefonoz eta digitalki iruzur egiteko kanpaina masibo berri batez ohartarazi du Ertzaintzak

Iruzur horretan, biktimek SMSak, dei faltsuak eta bideo-deiak jasotzen dituzte berehalako mezularitzako WhatsApp aplikazioaren bidez, eta bankuko datuak eta bankuko kontuetarako sarbide-gakoak emateko eskatzen zaie. Iruzur-kanpainak eragin handia izan du azken aste hauetan Gipuzkoan, baina Ertzaintzan salaketak hiru euskal lurraldeetan jarri dituzte.

Azken asteetan, Ertzaintzak jakin du WhatsApp aplikazioaren bidez iruzur-kanpaina bat zegoela martxan, eta batez ere Gipuzkoako Lurralde Historikoari eragiten ziola. Iruzur horren bidez, biktimak testu-mezu bat (SMS) jasotzen du, igorlea Alcampo ONEY edo Alcampo DUA ONEY kreditu-txartelari dagokion zenbakia da, eta simulatzen du bere banku-erakundeak diru-kopuru handi baten balizko mugimendu bati buruz egindako jakinarazpen ofizial bat dela.  SMSak telefono-zenbaki bat ematen du, ustez, mugimendua blokeatzeko.

Adierazitako zenbaki horretara deitzen duenean, biktimak ez du berehalako erantzunik jasotzen, baina ondoren bideo-dei bat jasotzen du WhatsApp bidez beste zenbaki batetik. Bertan, pertsona bat bankuaren ordezkari gisa aurkezten da, eta, premiaz, bezeroaren NANaren datu osoak, txartelaren PIN kodea eta txartelen datu guztiak eskatzen ditu, diru-mugimendu susmagarri bat blokeatzeko.

Kasu batzuetan, datu guztiak eman ondoren, iruzurgileak biktimari eskatzen dio NFC aplikazio bat deskargatzeko telefono mugikorrean, bi gailuren artean informazioa modu seguru eta azkarrean trukatzeko, eta banku txartela irakurgailuaren azpian jartzeko, eragiketa egiteko.

Ondoren, biktimari jakinarazten diote, bere banku-erakundearekin harremanetan bide ofizialetatik jarri ondoren, dirua atera dutela, eta eragindako txartelak prebentzioz blokeatzen ditu kargu berriak saihesteko.

2026an, orain arte, Ertzaintza Alcampo ONEY txartelaren karguengatik jarritako 40 salaketa ikertzen ari da, baita NFC erreminta batekin eskaneatuta egindako iruzurren beste 11 salaketa ere, delitu-modalitate horien egileak identifikatzen saiatzeko.

PREBENTZIOZKO GOMENDIOAK

Ertzaintzak gogorarazi du benetako bankuek ez dutela datu sentikorrik eskatzen ez telefonoz ez berehalako mezularitza bidez aldez aurretik egiaztatu gabe. Horrelako iruzurrak prebenitzeko, honako jarraibide hauek jarraitzea gomendatzen da:

• PINa SEKRETUA DA: Inoiz ez da PIN kode pertsonala eman behar telefonoz, berehalako mezularitza bidez edo posta elektroniko bidez. PINa zure funtsak babesteko gakorik garrantzitsuena da, eta aurrez aurre edo autentifikazio biometrikoko kanal seguruen bidez bakarrik eskatzen da.
• NORTASUNA EGIAZTATZEA: Bakuaren izenean dei bat jasotzen baduzu, eseki eta zuzenean txartelaren ordainagirian edo aplikazio mugikorrean agertzen den telefono-zenbakira deitu iruzurgile bat den egiaztatzeko.
• APLIKAZIO OFIZIALAK: Ez da txartelak irakurtzeko aplikazio ezezagunik deskargatu behar, eta ez da daturik eman behar kanpoko NFC irakurgailuen bidez, jatorriaz seguru egon gabe.
• HARREMANETARAKO BIDEAK: Zalantzaren bat izanez gero, bezeroari arreta emateko zerbitzu ofizialarekin jarri behar da harremanetan, edo bulego fisiko batera joan.