26_0353 Gasteizen gizon bat atxilotu dute emakume bati poltsa lapurtzeagatik

Ertzaintzako agenteek gizon bat atxilotu dute Arabako hiriburuan edadeko emakume bati poltsa lapurtzeagatik. Emakumeak joan-etorriak errazteko erabiltzen zuen taka-takako saski barruan zeraman poltsa.

Atzo, osteguna, goizeko hamabiak laurden gutxi aldera, Ertzaintzari jakitera eman zioten emakume bati poltsa lapurtu ziotela Gasteizko Txagorritxu auzoko plaza batean. Emandako informazioaren arabera, ustezko lapurra hainbat pertsonaren artean eutsita zuten.

Herritarrak babesteko lanetan ari zen eta bertaratu zen patruilak hainbat pertsonarekin hitz egin zuen, horien artean, biktimarekin, espainiar nazionalitateko 86 urteko emakumearekin. Emakumeak ertzainei esan zienez, kalean taka-takaren laguntzaz oinez zihoanean, pertsona bat hurbildu zitzaion helbide batez galdezka. Zegozkion jarraibideak ematen zizkion bitartean, eta emakumea ohartu gabe, poltsa hartu zion taka-takako saskitik.

Biktima lapurretaz jabetu zenean, ustezko lapurrak poltsa beste pertsona bati ematen ziola ikusi zuen, eta horrek bizikleta batean ihes egin zuen. Emakumeari oinezko batzuek lagundu zioten, eta inplikatuari eustea lortu zuten.

Agenteek ustezko lapurra, magrebtar jatorriko 30 urteko gizona, identifikatu zuten. Handik laster, biktimaren poltsa berreskuratu ahal izan zuten, emakume batek Ertzaintzari eman baitzion inguruan aurkitu ondoren, baina diru-zorro batean zeraman dirua falta zen. Antza denez, lapurraren ustezko laguntzaileak diru hartu eta bota egin zuen.

Egitate horien aurrean, batez ere jabetzaren aurkako egitateengatik aurrekariak dituen inplikatua ebasketa-delitua leporatuta atxilotu zuten.

Ertzaintzak zabalik du ikerketa, egitateetan parte hartu zuen bigarren pertsona aurkitzeko.