Gizon bat atxilotu dute Bilbon, bi pertsonari arma zuri batekin erasotzeagatik

Ertzaintzak gizon bat atxilotu du Bilbon, lesio-delitu bat egotzita, borroka batean bi pertsona arma zuri batekin zauritu ondoren. Horietako bat, liskarrarekin lotutako beste zauritu batekin batera, Basurtuko Ospitalera eraman behar izan dute, zauriak tratatzeko.

Goizaldeko laurak baino lehentxeago, Ertzaintzak abisua jaso du, Bilboko erdiguneko aisialdi-lokal baten inguruan izandako borroka baten ondorioz hainbat pertsona zauritu direla esanez.

Bertaratuta, patruilek egiaztatu dute bi gazteri arma zuri batekin eraso egin zietela, eta haietako batek premiazko osasun-laguntza behar zuela. Egindako lehen ikerketen arabera, biktimek eztabaida izan zuten egilearekin, eta hark objektu zorrotz batekin eraso zien, ondoren ihes egiteko.

Bestalde, borrokan parte hartu duen hirugarren biktima bati ere osasun-langileek lagundu behar izan diote.

Era berean, agenteek beharrezko informazioa eskatu dute erasotzailea identifikatu ahal izateko, eta handik gutxira aurkitu dute, aipatutako tokiaren inguruan.

Gertakarien larritasuna ikusita, susmagarria atxilotu eta ertzain-etxera eraman dute, dagozkion eginbideei ekiteko.

Atxilotua, 37 urteko gizon bat, arma zuriz egindako lesio-delitu bat egotzita ikertzen ari dira, eta Bilboko Guardiako Epaitegiaren esku utziko dute datozen orduetan.

Biktimei dagokienez, horietako bi Basurtuko Ospitalera eraman behar izan dituzte, larri, zauriak sendatzeko.