Gizon bat atxilotu dute Arrigorriagan 12.000 euroko iruzurra egiteagatik eta identitatea ordezteagatik

Ertzainek, Balmasedako Ertzain-etxeak egindako ikerketa baten ondorioz, 29 urteko gizon bat atxilotu dute, ustezko iruzur-delitua eta identitatea ordeztea leporatuta. 11.922 euroko transferentziak egin zituen enpresa bateko kontuetatik bere izenean zegoen beste batera.

Maiatzean, Alonsotegiko enpresa batek salaketa jarri zuen iruzur baten biktima izan zelako, bere titularitateko kontutik hirugarren pertsona baten beste kontu batera legez kontra egindako 11.922 euroko balioko hainbat transferentziaren bidez.

Balmasedako Ertzain-etxeko agenteek hasitako ikerketek funtsak hartu zituen kontuaren titularraren identitatea argitu zuten. Hori dela eta, kontu horren prebentziozko enbargoa eskatu zuten.

Kontua telematikoki irekita egon arren eta horrek zekarren konplexutasuna gorabehera, banketxeak Ertzaintzaren ikerketan lagundu izanari esker aurkitu ahal izan zuten titularra, eta poliziak zaintza-dispositibo bat ezarri zuen Arrigorriagako banku-bulego batean.

Joan den asteazkenean, ikertzaileek susmagarria ikusi zuten bulego horretan, iruzurrezko beste transferentzia bat egiten saiatzen ari zenean, eta iruzur-delitua eta identitatea ordeztea leporatuta atxilotu zuten, beraz.  

Beharrezko polizia-izapideak egin ondoren, atxilotua, 29 urtekoa, agintari judizialaren eskuetan jarri zuten arratsaldean bertan. Ikerketak zabalik jarraitzen du, eta ez dute baztertzen atxiloketa gehiago egitea.