Eusko Jaurlaritzak diskoteketako ikuskapenak areagotuko ditu Urtezahar gauean segurtasuna bermatzeko

Ertzaintzak ikuskapen-operatibo berezi bat burutu du 700 pertsonatik gorako edukiera duten lokaletan segurtasun-neurriak behar bezala betetzen diren egiaztatzeko.
Urtarrilaren 1eko goizaldean urte-amaierako kotiloien aforoa, adingabeei sarrera debekatzen zaien eta ixteko ordutegia kontrolatuko dituzte.

Ertzaintza, Eusko Jaurlaritzako Joko eta Ikuskizun Zuzendaritzak eskatuta, ikuskapen- eta kontrol-dispositibo berezi bat burutzen ari da Euskadiko diskoteka handietan, urte amaierako ospakizunak segurtasun-baldintzetan eta Euskadiko ikuskizunetako araudia betez egingo direla bermatzeko.

Ikuskapenak abenduaren 27an hasi ziren eta gaur arte, abenduaren 30era arte, egin dira 700 lagunetik gorako lokaletan, 8 guztira (4 Bizkaian, 2 Araban eta 2 Gipuzkoan). Kontrol horiek areagotu egingo dira urtarrilaren 1eko goizaldean, eta Ertzaintzako Joko eta Ikuskizun Unitateko agenteek egiaztatuko dute kotiloiak behar bezala garatzen ari direla.

Urtezahar aurreko ikuskapenak

Urtezahar egunaren aurreko egunetan, Ertzaintzako agenteek ikuskapenak egin dituzte establezimendu guztietan, batez ere lokaleko konfigurazio-aldaketak antzemateko, bai eta urte amaierako ospakizunetara joaten direnen segurtasuna alda dezakeen atrezzo berria egiaztatzeko ere. Horrez gainera, jantzitegien kudeaketa, pirotekniarik erabiliko den eta lokalaren ohiko jarduera aldatzen duten beste egoera batzuk ere egiaztatuko dituzte.

Era berean, ikuskapenetan, Joko eta Ikuskizun Unitateko agenteek egiaztatuko dute lokalen autobabeserako planak indarrean dauden, harrerako langileak eta segurtasun pribatuko zerbitzuak behar bezala gaituta dauden, larrialdietarako funtzioak banatu diren, ebakuazio-bideak seinaleztatuta dauden eta funtzionalak diren eta suteen kontrako babes-sistemak dauden, arauzko berrikuspenak betetzen dituztela ziurtatzeko.

Kontrola urtarrilaren 1eko goizaldean

Urtezahar gaueko ospakizunetan, Ertzaintzak lokal barruko ikuskapenak areagotuko ditu, kanpoan prebentzio-lanak egingo dituzten herritarren babeserako agenteen laguntzarekin. Establezimendu barruan, Joko eta Ikuskizun Unitateko agenteek egiaztatuko dute edukiera zorrotz betetzen den, ebakuazio-bideen funtzionamendu egokia, larrialdietako irteeren irisgarritasuna eta ixteko ordutegia.

Era berean, lokal horietan adingabeen presentzia ere kontrolatuko dute, debekatuta baitago, adingabeei edo gazteei zuzendutako saioetan izan ezik, eta horietan 14 urtetik 17 urtera bitarteko pertsonak bakarrik egon ahal izango dira. “light” ospakizun horietan debekatuta dago alkohola eta tabakoa saltzea, eta kartel batekin iragarrita egon behar dute lokalaren sarreran.

Eusko Jaurlaritzaren helburua instalazioei eta horietako langileei legez eskatzen zaizkien neurriak betetzen diren zaintzea da, ikuskizunen garapen egokia eta abenduaren 31 gauerako aurreikusitako festa horietara joaten diren bezeroen segurtasuna bermatzeko.