Vitoria-Gasteizko Administrazioarekiko Auzietako 2 zenbakiko Epaitegiko lehen auzialdiko epaileak kautelaz eten du Polizia eta Larrialdietako Euskal Akademiako zuzendari nagusiaren 2025eko otsailaren 10eko Ebazpena, Ertzaintzako Ikuskapen Eskalako ofizialorde kategoriara igotzeko hautaketa-prozedurarako deialdia egiten duena. Epaitegiak argudiatu duenez, Polizia eta Larrialdietako Euskal Akademiako zuzendari nagusiaren 2022ko maiatzaren 4ko Ebazpenaren aurkako errekurtsoari buruzko epai irmoa ez dagoen bitartean (ebazpen horren bidez, Ertzaintzaren Ikuskapen Eskalako ofizialorde kategoriara igotzeko hautaketa-prozedurarako deialdia egin zen), ezin da helburu bereko prozesurik egin. Prozesu horretan euskararen ezagutzaren balorazioari buruzko oinarriak errekurritu ziren.
Administrazioarekiko Auzien Gasteizko 2. Epaitegiak bertan behera utzi duen prozesuak oinarri batzuk ditu, Ertzaintzaren errealitatearekin bat datozenak, eta indarrean dagoen legeriak derrigortasunei dagokienez ezartzen duen derrigortasun-indizea gainditzen ez dutenak. Gainera, Ertzaintzaren Negoziazio Mahaian ordezkaritza duten sindikatuek (125. mahaia) partekatutako eta onartutako oinarriak dira. Gaur egun 1.000 pertsonatik gora daude, Ertzaintzako agenteak, igoera-prozesu horretarako prestatzen, eta kautelazko neurri horiekin azken hilabeteetako ahalegina geldiarazita ikusten dute. Horrela, datorren asteazkenean, ekainak 18, 16:30ean BECen egitekoa zen proba bertan behera geratuko da.