Irun, atxilotu bat droga-trafikoagatik

Ertzaintzako agenteek 55 urteko gizon bat atxilotu zuten abuztuaren 8an, ostirala, Irunen, substantzia estupefazienteen trafiko-delitu bat egotzita. Kilo erdi anfetamina baino gehiago zeraman gainean, eta etxean egindako miaketan hainbat droga kantitate, prestatzeko eta banatzeko hainbat tresna eta ia bi mila euro atzeman dizkiote.

Abuztuaren 8an, ostiralean, Ertzaintzak jakin zuen Irungo kale batean eztabaida bat izaten ari zela bi pertsonen artean. Agenteak bertaratu ziren, eta biak identifikatu zituzten. Inplikatuetako bati, 55 urteko gizon bati, egindako azaleko miaketan, hauts zuriko bi pakete aurkitu zizkioten, ustez anfetamina zutenak. Horietako bat 500 gramotik gorakoa zen, eta bestea 3 gramokoa.

Hori dela eta, gizon hori atxilotu zuten droga-trafikoko ustezko delitu batengatik, eta haren etxean sartzeko eta miatzeko eskatu zioten agintari judizialari. Leku horretan hainbat substantzia estupefazienteren kopuru txikiak aurkitu dira, hala nola MDMA edo estasia, haxixa eta anfetamina, baita droga pisatzeko, prestatzeko eta banatzeko hainbat tresna ere, ia bi mila euro eskudirutan eta beste objektu batzuk.

Atxilotuak polizia-aurrekariak ditu, eta ertzain-etxera eraman zuten beharrezko eginbideak egiteko. Amaitutakoan, epailearen esku utzi dute gaur, eta Martuteneko espetxean sartzeko agindua eman dute. 

Jaitsi Argazkia