Torres Lehendakariordeak itxiko du ‘Zatoz eta zain gaitzazu: turismoa Gipuzkoarako enpleguaren eta ongizatearen motor gisa’ jardunaldia

PRUEBA

Mikel Torres lehendakariorde eta Ekonomia, Lan eta Enplegu sailburuak amaiera eman dio gaur El Diario Vasco egunkariak antolatutako “Enplegu turistikoaren erronkak: eraldaketa justu eta inklusiborantz” jardunaldiari. Bertan, lanaren balioan eta profesionalen zaintzan zentratu da bere hitzaldia, eta Euskadiko eredu turistikoak enpleguaren kalitatea izan behar duela ziurtatu du, benetan jasangarria izan dadin.

Sailburuak turismoaren indarra nabarmendu du, BPGaren %7 eta enpleguaren %11 ematen baitio euskal ekonomiari. Hala ere, oraindik ere dauden erronken inguruan ohartarazi du, batez ere ostalaritza eta zerbitzuak markatzen dituzten urtarokotasuna eta behin-behinekotasuna. «Turismoa ez da soilik bisitariak jasotzea, bisitatzen gaituztenak zaintzea ere bada, baina, batez ere, sektore horrek, bere langileek, beren onena eman dezaten laguntzen dutenak zaintzea», adierazi du. «Gure helburua argia da: enplegua duina izatea, egonkorra eta inklusiboa izatea. Kalitatezkoa izan dadila», gaineratu du.

Torresek zehaztu du bere Saila eta Lanbide aktiboki ari direla lanean prekarietateari aurre egiteko eta turismoko profesionalen etorkizuna ziurtatzeko. Horretarako, batetik, turismoari lotutako Lanbide Heziketa, Heziketa Dualeko programak eta sektorearen eskaera berriei (digitalizazioa eta jasangarritasuna) erantzuteko etengabeko trebakuntza indartu behar dira.

Arlo sozialean, Eusko Jaurlaritzak laneratzea bultzatuko du, Atzerritarren Lege berria eta eskuratutako konpetentziak erabiliz, pertsona migratzaileentzako errotzea eta lan-baimenak errazteko, aniztasuna indargune gisa defendatuz. Gainera, elkarrizketa soziala giltzarria da, sindikatuekin eta enpresekin lan eginez hitzarmen kolektiboek baldintza justuak eta egonkorrak ziurta ditzaten.

Azkenik, Lehendakariordeak azpimarratu du enplegua eta eredu turistikoa eskutik joan behar direla, eta, beraz, erabilera turistikoko etxebizitzak bezalako fenomenoak arautuko direla, sektorearen hazkundea «etxebizitza duinaren edo kohesio sozialaren kontura gerta ez dadin».

Torresek sektorearen giza rola azpimarratu du. «Turismoa milaka langile eta milaka langile dira hemen, Gipuzkoan, egunero sektore horri eusten diotenak eta lurraldearen irudia ere proiektatzen dutenak… Bisitatzen gaituztenak zaintzea da, baina baita zaintzen gaituztenak ere, gizarte-kohesioa eta ongizate partekatua bermatuz», adierazi du.