2025eko Bilboko Ospetsua hautatzeko parte-hartze bidezko prozesua martxan da

PRUEBA

Bilboko Udalak abian jarri du 2025eko Bilboko Ospetsua hautatzeko parte-hartze bidezko prozesua. Aitorpen horren helburua da Bilbon edo haren metropoli-eremuan jaio diren edo bizi diren eta jokabide zibikoan edo herritarren bizitzako edozein eremutan eredugarri gisa nabarmendu diren pertsonak saritzea.

Prozesua Ohoreei, Merezimenduei eta Zeremonialari buruzko Udal Araudian eta Euskadiko Toki Erakundeei buruzko Legean araututa dago, eta gobernantza ireki, garden eta inklusiboko ariketa modura ulertzen da, udalak kultura demokratikoarekin daukan konpromisoa eta interes komuneko gaien inguruan auzotarrek daukaten inplikazioa indartzeko. Lehenengo fasea urriaren 6an hasiko da eta 19an bukatuko da. Aldi horretan, Bilbon erroldatutako 16 urtetik gorako guztiek hautagaitza-proposamen bat aurkeztu ahal izango dute, udalaren webgunean eskuragarri dagoen formulario digital sinple baten bidez.

Sistemak automatikoki baliozkotuko ditu errolda-datuak, eta parte-hartzaile bakoitzak hautagaitza bakarra aurkeztu ahal izango du, proposatutako pertsonaren izen osoa, zer jarduera-eremutan bereizi den eta merezimenduen aipamen laburra adierazita. Etapa hori funtsezkoa da; izan ere, herritarrak berak hasten du prozesua, hiriko erreferentetzat hartzea merezi dutenak proposatuz.

Fase horren ondoren, hautagaitzak berrikusi egingo dira, erregelamenduan ezarritako baldintzak betetzen dituztela egiaztatzeko. Hiru hautagaitza baino gehiago jasotzen badituzte, Bilboko Hiri Kontseiluak hautatuko ditu finalistak, isilpeko bozketa bidez. Prozesua azaroaren 24tik 30era bitartean amaituko da, data horietan herritarren bozketa egingo baita. Babes handiena lortzen duen hautagaia 2025eko Bilboko Ospetsu izendatuko da.

Eredu horrekin, Bilbok Ospetsua hautatzearen aldeko apustua egiten du, aitortza eta balio partekatuen ariketa kolektibo baten bidez. Izan ere, hiria ez dute soilik azpiegiturek edo zerbitzuek definitzen, baizik eta, batez ere, beren ereduarekin bizikidetzaren bidea markatzen duten eta aurrerapen komuna ahalbidetzen duten pertsonek.