Mugikortasun Jasangarriaren Sailak partaidetza-prozesu bat jarri du abian Euskadiko aldirien izen berria erabakitzeko

PRUEBA

Herritarrek Besaide, Lottu eta Lurbil izenen artean aukeratu dezakete marka berrirako, urriaren 19ra arte Irekian bozkatuta

Aldiriko tren-zerbitzuak izen berri bat izango du Euskadin, Eusko Jaurlaritzako Mugikortasun Jasangarriaren Sailak abian jarritako partaidetzazko prozesu batean herritarrek aukeratu ahal izango duten marka bat. Prozesu hori urriaren 19an amaituko da.

Bozketan parte hartu nahi dutenek Irekiaren webgunean erregistratuta egon beharko dute, besterik gabe, eta bertan botoa emateko hiru aukerak aurkituko dituzte: Besaide, Lottu eta Lurbil. Denek gogorarazten dute lurraldearekiko hurbiltasuna, Susana García Chuecak zuzentzen duen sailak gero eta zerbitzu hurbilagoa eta lurraldeari lotuagoa eskaintzeko duen interesaren ildotik. 

Aldiriko tren-zerbitzuak Espainiako gobernuak transferitu zizkion Eusko Jaurlaritzari 2025eko urtarrilaren 1ean, eta Renfe Estatuko enpresak haiek operatzen jarraitzen du. Lau linea dituzte, hiru Bizkaian eta bat Gipuzkoan, Arabako Lautadako zerbitzu berriaz gain. Lehen urte honetan, Mugikortasun Jasangarriaren Saila lanean ari da zerbitzuan hobekuntzak inplementatzeko eta beste batzuk ezartzeko, hala nola Araban aipatutakoak, maiatzaren 30ean abian jarritakoak, Karrantza-Aranguren trenbide-anezka edo irisgarritasunaren arloko aurrerapenak.

Mugikortasun Jasangarriaren Sailak hobekuntza horiekin batera marka berri eta bereizi bat jarri nahi du, eta, horregatik, aldiriko zerbitzuak etorkizunean izango duen izenari buruzko erabakian parte hartzera gonbidatzen ditu herritarrak. 

Inkesta, ‘Zer izen eman nahiko zenieke Euskadiko aldiriko trenei?’ galdera izenburu duela, Irekiaren webgunean dago dagoeneko, eta berekin tresna berri bat estreinatuko da Eusko Jaurlaritzaren Gobernu Irekiaren kanalaren barruan, herritarrek parte hartzeko eta lankidetzan aritzeko bide berriak eskaintzea helburu hartuta.