Ikasturte honetan EUNEIZek bere graduatuen lehen promozioa jarriko du euskal gizartearen zerbitzura

PRUEBA

• Zientzia, Unibertsitate eta Berrikuntzako sailburuak EUNEIZen ikasturte berria inauguratu du.

• EUNEIZ “hazten eta bere nortasun instituzionala zehazten” ari dela nabarmendu du Pérez Iglesiasek.

• Unibertsitate Legea izapidetzeko lehen hilabete hauek eragileen «iritziak eta itxaropenak biltzeko” balioko dutela adierazi du.

Juan Ignacio Pérez Iglesias Zientzia, Unibertsitate eta Berrikuntzako sailburuak EUNEIZen ikasturte berriari hasiera eman dio gaur goizean Gasteizen. Ekitaldian, sailburuak nabarmendu du EUNEIZentzat ikasturte garrantzitsua dela bere graduatuen lehen promozioa euskal gizartearen zerbitzura jarriko duelako.

Bere hitzaldian, adierazi duenez, EUNEIZ “euskal unibertsitate-sisteman integratu da eta sistema horren kalitatea eta konpromiso soziala ezagutzen ditugu”. Datuek, azpimarratu du, «hala bermatzen dute. Gure unibertsitateetatik ateratzen diren gazteek duten prestakuntza-maila ikusi besterik ez dago, unibertsitate horien lanaren seriotasunaz eta unibertsitate aurreko mailetako irakaskuntzaren kalitateaz jabetzeko «.

Era berean, EUNEIZek hezkuntza-eskaintza sendotu duela nabarmendu du; izan ere, 2022-2023 ikasturtean bere ibilbidea lau gradurekin hasi ondoren, gaur egun hamar gradu eta lau master eskaintzen ditu, Euskal Autonomia Erkidegoan «unibertsitate-prestakuntza aberasten dutenak. Gure unibertsitateek, gainera, euskal gizarteak goi-mailako prestakuntzaren arloan dituen beharrei erantzuten jakin dute”.

“Badakigu”, zehaztu du, “unibertsitate proiektu berri orok sendotze-bide bat egin behar duela, eta EUNEIZ hazten eta bere nortasun instituzionala zehazten ari da”. Eta egin beharreko ibilbide horretan Zientzia, Unibertsitate eta Berrikuntza Sailaren laguntza eskaini dio.

Unibertsitate lege berria

Sailburuaren hitzetan, ikasturte berri hau garrantzitsua izango da euskal unibertsitateentzat ere; izan ere, unibertsitate lege berriak «datozen hamarkadetan izango duten ibilbidea zehaztuko baitu». Adierazi duenez, legearen izapidetzearen lehen hilabete hauek «balioko digute, eragileen iritzia eta itxaropenak jasotzeko, baita unibertsitateenak ere, Legebiltzarrera eztabaidatzeko eta, hala badagokio, onartzeko bidali baino lehen”.

Lege berriaren helburu nagusia, bere eskumenen esparruan, «unibertsitate-eredu propioa» garatzea dela adierazi du sailburuak, sistemak «azken urteetan eman dituen adierazle onak eta bikainak erakusten jarrai dezan».

Ildo horretan, sistemaren aniztasuna eta pluraltasuna babesteko beharra azpimarratu du: «Gure unibertsitate-sistemak ondo bereizitako profil instituzionalak ditu, bai eta irakaskuntza-eskaintzak eta funtzioak betetzeko modu desberdinak ere. Aniztasun horrek aberastu egiten gaitu, euskal gizarteari egindako ekarpenak gainjarri beharrean, elkarren osagarri baitira.  Egoera honek ez du aldatu behar.

Sailburuak azpimarratu duenez, Sailak unibertsitateen arteko lankidetza sustatu nahi du, aniztasun akademikoa bultzatu eta, euskal unibertsitate guztiek, beren berezitasunei men eginda, euskal gizartearen aurrerabideari eta herritarren ongizateari lagun diezaioketela ziurtatu.

Bere ustez, datozen urteetarako erronka «hobetzen jarraitzea da», eta, ildo horretan, unibertsitateek gazte gehiago hartu behar dituztela adierazi du, ikerketa hobetu — «ikerkuntza-jarduerak unibertsitateko irakaskuntza kualifikatzen duen begirada kritikoa ematen baitie irakasleei» —, eta nazioartean gero eta presentzia handiagoa izan.

Bestalde, Alex Rayon brainandcode.tech-eko zuzendariak eskainitako «Adimen Artifiziala eta Hezkuntza: elkarbizitzarako binomioa» izenburuko inaugurazio-ikasgaiaren ildotik, adimen artifiziala egun lantzen ari diren 2030erako Zientzia, Teknologia eta Berrikuntza Planean islatuta egongo dela iragarri du sailburuak, eta baita bederatzi Berrikuntza Itsasargietako bat izango dela ere. «Abangoardiako ezagutza sortzea sustatuko dugun eremuetako bat izango da gizartean inpaktua eragiteko asmoz «, gehituz.