Gizon bat atxilotu dute Irunen bikotekide ohia haren etxean itotzen saiatzeagatik

Ertzaintzak latinoamerikar jatorriko 40 urteko gizon bat atxilotu zuen joan den igandean Irunen, bikotekide ohiaren etxera joan eta itotzen saiatu ondoren. Atxilotuari hilketa-saiakeraren delitua leporatu diote, eta gaur goizean agintari judizialaren eskuetan jarri dute eta epaileak espetxeratzeko agindua eman du.

Egitateak joan den igandean, urriaren 26an, goizeko lehenengo orduan gertatu ziren. Irungo Ertzain-etxeko patruilak herriguneko eraikin batera joan ziren, eskailera-buruan gizon batek emakume bati eraso egin ziola esanez abisua jaso ondoren.

Iritsi zirenean, agenteek gizon bat, ustezko erasotzailea, aurkitu zuten eraikinaren kanpoaldean. Gizona hainbat pertsonaren artean eutsita zuten, berriz atarira sartu nahian ari baitzen. Eraikinaren barruan, emakume batek, gizonaren bikotekide ohia denak, bizilagunen laguntza jaso zuen erasotzailea lepotik heldu eta hormaren kontra itotzen hasi zenean. Lehenengo, emakumeak giltza-sorta batekin defendatu zuen bere burua eta gero beste pertsona batzuk lagundu zioten eta erasotzailearengandik askatu zuten.

Emakumeari eraso egin ondoren, gizona bortizki sartu zen etxean, biktimaren logelaraino, eta altzariak, ispilu bat, telebista bat, ordenagailu eramangarri bat eta bi telefono mugikor hautsi zituen, besteak beste.  

Erasotzaileak bazekien non bizi zen bere bikotekide ohia Irunen, eta aurretik harengandik urruntzeko agindua izan zuen, nahiz eta neurri judizial hori dagoeneko ez zegoen indarrean.

Egitateen biktima, latinoamerikar jatorriko emakume bat, osasun-zentro batean artatu zuten, eta Ertzaintzak genero-indarkeriako kasuen protokoloa jarraituz lagundu zion.

 Ertzainek hilketa-saiakera leporatuta atxilotu zuten gizona. Beharrezko eginbideak amaitu ondoren, atxilotua gaur, asteartea, jarri dute Irungo Emakumearen aurkako indarkeriaren arloko epaitegiaren eskuetan, eta epaileak espetxeratzeko agindua eman du.