Bi gizon atxilotu dituzte Gernika-Lumon substantzia sorgorgarriekin trafikatzeagatik

Ertzaintzako agenteek 60 eta 41 urteko bi gizon atxilotu dituzte Gernika-Lumon, drogarekin trafikatzea leporatuta. Polizia-operatiboan egin diren bi miaketetan hiru kilo haxix inguru eta speed eta marihuana aurkitu dituzte.

Gernika-Lumoko Ertzain-etxearen ikerketa joan den abuztuan hasi zuten, agenteek hauteman baitzuten udalerriko etxe baten inguruan eta kalean substantzia sorgorgarriak saltzen ari zirela.

Egindako zaintzei eta jarraipenei esker, Merkatu Plazaren inguruan legez kanpoko trafikoan aritzen zirela egiaztatu ahal izan zuten. Ikerketan zehar, agenteek hainbat pertsona identifikatu zituzten eta hainbat substantzia, besteak beste speed eta marihuana, konfiskatu zituzten. Gainera, egiaztatu zuten susmagarri batek ustez bere etxean edo etxearen eranskinetan gordetzen eta zaintzen zituela substantzia sorgorgarriak, eta harreman zuzena eta ohikoa zuela ustezko bigarren inplikatu batekin.

Joan den asteazkenean, ikerketako agenteek Gernikako-Lumoko erdiguneko kale batean geldiarazi zuten hainbat bidaiari zeramatzan auto bat. Susmagarrietako bat bertan zihoan, eta ertzainek kilo bat haxix aurkitu zuten ibilgailua miatu zutenean, paper filmez bilduta eta hamar tabletatan banatuta.

Bildutako ebidentzia guztien aurrean, atzo, osteguna, Ertzaintzak operatibo bat burutu zuen ikertzen ari ziren bi gizonak atxilotzeko droga-trafikoaren delitu batengatik.  Jarraian, Txakur Unitatea aktibatu zuten, epailearen baimenarekin, bi atxilotuen etxeetan miaketa egiteko. Etxebizitzetako batean beste 2,200 kilogramo haxix, 50 gramo anfetamina sulfato edo speed, marihuana-kopuru txikiak, 31.700 euro eta doitasun-balantza bat aurkitu zituzten.  Beste etxean substantzia sorgorgarrien kopuru txikiak, baskula bat eta ukabil amerikar bat, debekatutako armatzat jotzen dena, konfiskatu zituzten.  

Gaur, ostirala, 41 eta 60 urteko bi atxilotuak, espainiar nazionalitatekoak, Gernika-Lumoko Guardiako Epaitegiaren eskuetan jarri dituzte polizia-eginbideak amaitutakoan.